मावळातील सहारा वृद्धाश्रमाला २ हजार पुस्तके भेट
मावळ | पुणे
वृद्धाश्रमातील ज्येष्ठ नागरिकांसाठी वाचन हे मनोरंजनाचे तसेच ज्ञानाचे साधन आहे. वाचनामुळे ते मानसिकदृष्ट्या सक्रिय राहतात आणि त्यांना नवीन विचारसरणी व अनुभव समजण्यास मदत होते. त्यामुळे या पुस्तकदान उपक्रमाचा उद्देश ज्येष्ठ नागरिकांसाठी वाचनाचे महत्त्व अधोरेखित करणे आहे.
अनाथ निराधार आजी-आजोबांसाठी असलेल्या कुसवली गाव (मावळ) येथील सहारा वृद्धाश्रमास पुस्तक प्रेमी जगन्नाथ नेरकर यांनी आज २ हजार ग्रंथांची भेट दिली.
आंदर मावळातील दुर्गम भागात असलेल्या या वृद्धाश्रमातील आजी-आजोबांना वाचन करण्यासाठी आता विविध विषयांवरील विपुल ग्रंथसंपदा उपलब्ध झाली आहे.
ज्येष्ठ साहित्यिक प्रभाकर ओव्हाळ, जेष्ठ समाजसेवक मानव कांबळे, मराठा सेवा संघाचे मार्गदर्शक ॲड लक्ष्मण रानवडे, प्रदीप बोरसे आदी यावेळी उपस्थित होते. श्री नेरकर यांचे पिंपरी चिंचवड शहरात ‘अ’ दर्जा प्राप्त सोहम सार्वजनिक ग्रंथालय असून वाचन चळवळ वृद्धिंगत करण्यासाठी गेली चाळीस वर्षापासून ते कार्य करीत आहेत.
सहारा वृद्धाश्रमाचे संचालक विजय जगताप, विष्णू मांजरे यांनी या उपक्रमाचे स्वागत केले. धार्मिक, ऐतिहासिक, मनोरंजनात्मक तसेच कथा, कादंबऱ्या, ललित साहित्य आदींचा या ग्रंथांमध्ये समावेश आहे. या अनोख्या ग्रंथ भेटीमुळे आजी आजोबांनी समाधान व्यक्त केले.
