पिंपरी, दि.६ मार्च २०२५ :- पिंपरी चिंचवड महानगरपालिका वृक्ष प्राधिकरण यांच्या वतीने ‘रानजाई महोत्सव’ आणि २८ वे भव्य ‘फळ-फुले भाजीपाला बागा प्रदर्शन व स्पर्धा’ दिनांक ७ ते ९ मार्च २०२५ या कालावधीत आयोजित करण्यात आले आहेत. या महोत्सवामध्ये विविध सांस्कृतिक कार्यक्रम, नृत्य, पथनाट्य, मॅजिक शो, पपेट शो, आर जे गेम्स आणि जनजागृतीसाठी विशेष कार्यक्रमांचा समावेश असणार आहे. आयुक्त तथा प्रशासक शेखर सिंह यांनी या महोत्सवात शहरवासियांनी सहभागी होण्याचे आवाहन केले आहे.
महापौर निवास, सेक्टर नं. २७ संत तुकाराम उद्यान शेजारी, निगडी प्राधिकरण येथे ७ मार्च रोजी सकाळी १०.३० वाजता महोत्सवाचे उद्घाटन होईल. या उद्घाटन कार्यक्रमास केंद्रीय राज्यमंत्री मुरलीधर मोहोळ, राज्याचे उपमुख्यमंत्री अजित पवार, उच्च व तंत्रशिक्षण मंत्री चंद्रकांत पाटील, क्रीडा व युवक कल्याण मंत्री दत्तात्रय भरणे यांसह अनेक मान्यवर उपस्थित राहणार आहेत.
तसेच, या कार्यक्रमास महाराष्ट्र राज्याच्या प्रमुख व्यक्तींची उपस्थिती असणार आहे. ९ मार्च रोजी प्रसिद्ध मराठी सिनेअभिनेत्री मृणाल कुलकर्णी यांचाही उपस्थिती राहील.
या भव्य महोत्सवासाठी मोठ्या प्रमाणात लोक सहभागी होणार असून, या कार्यक्रमाच्या माध्यमातून पिंपरी चिंचवड महानगरपालिकेची कार्यक्षमता आणि विविध उपक्रमांची माहिती देखील जनतेपर्यंत पोहोचविली जाईल.
