पिंपरी चिंचवड | 26 फेब्रुवारी: शहरभर भटक्या कुत्र्यांचा उपद्रव प्रचंड वाढल्याने नागरिकांचे जीवन असुरक्षित झाले आहे. मागील दीड महिन्यापासून महापालिकेने भटक्या कुत्र्यांच्या नियंत्रणावर कोणतीही ठोस कारवाई केलेली नाही. परिणामी, नागरिकांवर हल्ल्याच्या घटना वाढल्या असून, लहान मुले, महिला आणि वृद्धांसाठी रस्त्यावर चालणेही धोकादायक झाले आहे.
महापालिकेच्या निष्क्रियतेला राष्ट्रवादी युवक काँग्रेसचा तीव्र विरोध!
राष्ट्रवादी युवक काँग्रेस – शरदचंद्र पवार पक्षाचे युवक पदाधिकारी मंगेश असवले यांनी प्रदेश उपाध्यक्ष विशाल वाकडकर यांच्या मार्गदर्शनाखाली महानगरपालिका आयुक्तांना पत्र देऊन या समस्येवर तातडीने उपाययोजना करण्याची मागणी केली आहे. अन्यथा, तीव्र आंदोलनाचा इशारा दिला आहे.
शहरभर दहशत – नागरिक भयभीत!
रस्त्यांवर भटक्या कुत्र्यांचे टोळके नागरिकांवर हल्ले करत आहेत.
लहान मुलांना चावा घेतल्याच्या अनेक घटना समोर आल्या आहेत.
रेबीज आणि संसर्गजन्य आजारांचा धोका वाढत आहे.
दुचाकीस्वारांचे अपघात वाढले आहेत.
राष्ट्रवादी युवक काँग्रेसच्या महत्त्वाच्या मागण्या:
तातडीने धरपकड मोहिम सुरू करावी.
विशेष टास्क फोर्स तयार करावा.
कुत्र्यांचे लसीकरण व नसबंदी मोहिम प्रभावीपणे राबवावी.
शहरातील प्रमुख भागांमध्ये कुत्र्यांसाठी निवासस्थाने व फीडिंग झोन तयार करावे.
२४x७ हेल्पलाईन सुरू करून नागरिकांच्या तक्रारी तत्काळ निवारण करावे.
“नागरिकांच्या सुरक्षिततेला प्राधान्य द्या, अन्यथा रस्त्यावर उतरू!”
“महापालिकेने फक्त आश्वासनं देऊन वेळ न दवडता तातडीने कारवाई करावी. अन्यथा, आम्ही रस्त्यावर उतरून प्रशासनाला जाग आणू!” – मंगेश असवले, राष्ट्रवादी युवक काँग्रेस (शरदचंद्र पवार पक्ष).
