पिंपरी चिंचवड महानगरपालिकेच्या समाज विकास विभागाने केले आयोजन
पिंपरी (४ मार्च २०२५): पिंपरी चिंचवड महानगरपालिकेच्या समाज विकास विभागाने सक्षमा प्रकल्पांअंतर्गत महिला दिनानिमित्त महिला मार्गदर्शन मेळाव्याचे आयोजन बुधवार दि. ५ मार्च २०२५ रोजी सकाळी ११ वाजता केले आहे. पिंपरी कॉलनी येथील यशवंतराव चव्हाण स्मृती रुग्णालयाजवळील आचार्य अत्रे रंगमंदिर येथे होणाऱ्या या मेळाव्यात सक्षमा प्रकल्पातील महिलांना सहभागी होता येणार आहे. समाज विकास विभागाच्या वतीने जास्तीत जास्त महिलांना या मेळाव्यात सहभागी होण्याचे आवाहन करण्यात आले आहे.
पिंपरी चिंचवड महानगरपालिकेचे आयुक्त शेखर सिंह हे या मेळाव्यात स्वयं सहाय्यता बचत गटांना मार्गदर्शन करणार आहेत. तसेच अतिरिक्त आयुक्त प्रदीप जांभळे पाटील “स्वयं सहाय्यता बचत गट पुढील वाटचाल” या विषयावर, आणि समाज विकास विभागाचे सहाय्यक आयुक्त तानाजी नरळे पिंपरी चिंचवड महानगरपालिका अंतर्गत राबवलेल्या विविध महिला योजनांची माहिती देणार आहेत.
या मेळाव्यात महिलांसाठी विविध सांस्कृतिक आणि मार्गदर्शनपर कार्यक्रम होणार आहेत. टाटा स्ट्राईव्हच्या फिल्ड समन्वयक निशा निमसे आणि त्यांचे सहकारी सांस्कृतिक कार्यक्रम सादर करणार आहेत. त्यानंतर टाटा स्ट्राईव्हच्या अजिता कर्वे “सक्षमा प्रकल्प माहिती व साध्य” या विषयावर, टाटा मोटर्स गृहिणी विभागाच्या अध्यक्षा शिल्पा देसाई “व्यवसायवृद्धी व मार्केट लिंकेज” या विषयावर, टाटा स्ट्राईव्हच्या सल्लागार अनिता राजन “महिला सक्षमीकरण” या विषयावर, टाटा स्ट्राईव्हचे मुख्य कार्यकारी अधिकारी अमेय वंजारी “घे भरारी” विषयावर, आणि टाटा ऑटोकॉम इंटेरिअर आणि प्लास्टिक डिझाईनच्या एचआर हेड स्मिता जाधव “महिला एकत्रीकरण” या विषयावर मार्गदर्शन करतील. याशिवाय यशस्वी महिलांचा सत्कार, मनोगत, आणि टाटा गृहिणींची यशस्वी गाथा देखील होणार आहेत.
बचत गटांना सक्षम करणारा प्रकल्प
पिंपरी चिंचवड महानगरपालिका आणि टाटा कम्युनिटी इनिशिएटिव्हस ट्रस्ट (टाटा स्ट्राईव्ह) यांच्यात २०२३ मध्ये महिला स्वयंसहाय्यता गटांचे सक्षमीकरण करण्यासाठी सामंजस्य करार करण्यात आला. ५ वर्षांमध्ये ५००० स्वयंसहायता गटांना सक्षम करण्याचे उद्दिष्ट ठेवले आहे. यात बचत गटाचे सर्वेक्षण, क्षमता बांधणी, सदस्य प्रशिक्षण, आर्थिक साक्षरता, उद्योजकता विकास आणि नेतृत्व विकास यावर प्रशिक्षण दिले जात आहे.
पिंक ई-रिक्षा योजना
राज्य शासन महिलांच्या आर्थिक सक्षमीकरणासाठी पिंक ई-रिक्षा योजना राबवत आहे. या योजनेचा उद्देश महिलांच्या रोजगार निर्मितीसाठी चालना देणे, आर्थिक व सामाजिक पुर्नवसन, आत्मनिर्भर बनवणे, आणि सुरक्षित प्रवासाचा पर्याय उपलब्ध करणे आहे. या योजनेविषयी माहिती मेळाव्यात दिली जाईल.
“सक्षमा प्रकल्पांतर्गत पिंपरी चिंचवड शहरातील महिला बचत गटांच्या आर्थिक आत्मनिर्भरतेसाठी विविध उपक्रम राबवले जात आहेत. महिला दिनानिमित्त, सक्षमा प्रकल्पातील महिलांसाठी आयोजित केलेला हा मेळावा त्यांच्या यशाचा उत्सव ठरेल.”
शेखर सिंह, आयुक्त तथा प्रशासक, पिंपरी चिंचवड महानगरपालिका
