पिंपरी | प्रतिनिधी
जागतिक महिला दिनाचे औचित्य साधून श्री जैन विद्या प्रसारक मंडळाच्या वतीने चिंचवड येथे भव्य रक्तदान शिबिराचे आयोजन करण्यात आले. या उपक्रमाला नागरिकांचा उत्स्फूर्त प्रतिसाद मिळाला असून तब्बल १,७५५ रक्तदात्यांनी रक्तदान करून समाजसेवेचा महान संदेश दिला. विशेष म्हणजे ‘बॉम्बे ब्लड ग्रुप’सारख्या दुर्मिळ रक्तगटाच्या रक्तदात्याने देखील रक्तदान केले, ज्यामुळे या शिबिराचे महत्त्व अधिक वाढले. व रक्तदानाचे महत्व समजले.
एकाच वेळी दोन ठिकाणी भव्य रक्तदान शिबिराचे आयोजन!
या शिबिराचे आयोजन रसिकलाल एम. धारिवाल इंटरनॅशनल स्कूल आणि संघवी केशरी महाविद्यालय व रसिकलाल एम. धारिवाल फार्मसी कॉलेज येथे करण्यात आले होते. १७ नामांकित रक्तपेढ्यांनी या शिबिरात सहभाग घेतला आणि रक्त संकलन करण्यात मोठी भूमिका बजावली.
शिबिराच्या यशस्वी आयोजनामध्ये श्री जैन विद्या प्रसारक मंडळाचे अध्यक्ष प्रकाश धारिवाल, शांतीलाल कटारिया, कार्याध्यक्ष शांतीलाल लुंकड, सचिव अ‍ॅड. राजेंद्रकुमार मुथा, खजिनदार प्रकाश चोपडा, संयुक्त सचिव प्रा. अनिलकुमार कांकरिया, राजेशकुमार साकला, विश्वस्त सतीश चोपडा, प्रवीण लुंकड, वालचंद संचेती, प्रकाश बंब तसेच रुबी हॉल क्लिनिकच्या डॉ. मुजुमदार, रक्ताचे नाते संस्थेचे राम बांगड, पालक, विद्यार्थी आणि अनेक मान्यवर उपस्थित होते.
महिला सशक्तीकरणाच्या दिशेने एक अनोखी संकल्पना!
या शिबिरात महिलांसाठी विशेष आरोग्य तपासणीची व्यवस्था करण्यात आली होती. महिलांची मोफत हिमोग्राम तपासणी करण्यात आली आणि त्यांच्या रक्तातील हिमोग्लोबिन पातळीविषयी मार्गदर्शन देण्यात आले. आरोग्य जागृतीसाठी विविध वैद्यकीय तज्ज्ञांनी मार्गदर्शन सत्र आयोजित केले, ज्यामध्ये महिला सशक्तीकरण आणि आरोग्य व्यवस्थापनाचे महत्त्व पटवून देण्यात आले.
विद्यार्थ्यांच्या पथनाट्याने वाढवली रक्तदानाची जागरूकता!
रक्तदान ही समाजसेवेतील सर्वोत्तम देणगी आहे, हा संदेश पोहोचवण्यासाठी श्री जैन विद्या प्रसारक मंडळाच्या विद्यार्थ्यांनी पथनाट्य सादर करून लोकांमध्ये जनजागृती केली. यामुळे मोठ्या संख्येने नागरिकांनी या शिबिरात सहभाग नोंदवला.
रक्तदात्यांसाठी विशेष भेटवस्तू!
या रक्तदान शिबिराचे यशस्वी आयोजन श्री जैन विद्या प्रसारक मंडळ आणि श्री शांतीलाल कटारिया – आदित्य बिल्डर्स यांच्या संयुक्त विद्यमाने करण्यात आले. रक्तदात्यांना विशेष भेटवस्तू देऊन त्यांचा गौरव करण्यात आला.
श्री जैन विद्या प्रसारक मंडळ – सामाजिक आणि शैक्षणिक कार्याचा उज्ज्वल वारसा!
सन १९२७ पासून श्री जैन विद्या प्रसारक मंडळाने शैक्षणिक आणि सामाजिक क्षेत्रात भरीव योगदान दिले आहे. समाजहितासाठी सातत्याने सामाजिक उपक्रम राबवणाऱ्या या संस्थेच्या प्रयत्नांमुळे रक्तदान चळवळीला नवीन प्रेरणा मिळाली. जागतिक महिला दिनाचे औचित्य साधत रक्तदानासह महिलांच्या आरोग्य जागृतीचा संदेश देण्याचा हा उपक्रम निश्चितच प्रेरणादायी ठरला.
हे ही वाचा
https://phoenixmetronews.in/?p=2785
रक्तदान करा – जीवन वाचवा!
रक्तदान हे केवळ समाजसेवा नाही तर मानवी जीवन वाचवण्याचा एक पवित्र हेतू आहे. अशा उपक्रमांमध्ये अधिकाधिक नागरिकांनी सहभागी होऊन समाजाच्या हितासाठी योगदान देण्याचे आवाहन आयोजकांनी केले.
