अण्णा बनसोडे यांचा नागरी सत्कार पिंपरी, उपमुख्यमंत्री अजित पवार
अण्णा बनसोडे यांचा नागरी सत्कार उपमुख्यमंत्री अजित पवार यांच्या हस्ते; पिंपरी चिंचवडच्या जनतेचा सन्मान – योगेश बहल
तीन वेळा आमदार, आता विधानसभेचे उपाध्यक्ष
पिंपरी, पुणे | दि. ८ एप्रिल २०२५ – राज्य विधानसभेचे उपाध्यक्ष आणि पिंपरी विधानसभा मतदारसंघाचे लोकप्रिय आमदार अण्णा बनसोडे यांचा नागरी सत्कार बुधवार, दिनांक ९ एप्रिल रोजी सायंकाळी ५ वाजता हॉटेल रागा पॅलेस, मदर तेरेसा उड्डाणपुल, काळेवाडी येथे आयोजित करण्यात आला आहे. या सत्कार समारंभाचे प्रमुख आकर्षण म्हणजे राष्ट्रवादी काँग्रेस पक्षाचे अध्यक्ष आणि उपमुख्यमंत्री अजित पवार यांचे प्रमुख उपस्थितीत होणारा सत्कार.
हा कार्यक्रम म्हणजे पिंपरी चिंचवड शहरासाठी गौरवाचा क्षण असल्याचे मत राष्ट्रवादी काँग्रेसचे शहराध्यक्ष योगेश बहल यांनी मंगळवारी पिंपरीत आयोजित पत्रकार परिषदेत व्यक्त केले. यावेळी शहरातील अनेक मान्यवर नेते, माजी आमदार, महापौर, नगरसेवक, विविध सामाजिक संघटनांचे पदाधिकारी आणि कार्यकर्ते उपस्थित होते.
योगेश बहल म्हणाले, “स्व. प्रा. रामकृष्ण मोरे यांच्या नंतर पिंपरी चिंचवडला मंत्री दर्जाचं पद मिळणं, हे शहरासाठी सन्मानास्पद आहे. अण्णा बनसोडे यांनी एकनिष्ठतेने पक्षाची सेवा केली आहे आणि तीन वेळा आमदार म्हणून निवडून येताना जनतेच्या विश्वासाला कायम जागले आहेत. त्यांच्या रूपाने सामान्य जनतेचा आवाज विधानसभेत पोहोचतो.”
हे हि वाचावे
पिंपरी-चिंचवडमध्ये नवीन एस.टी. बस आगारासाठी आमदार शंकर जगताप यांची आग्रही मागणी
अण्णा बनसोडे यांनी महापालिकेत नगरसेवक, स्थायी समिती सभापती अशा जबाबदाऱ्या समर्थपणे पेलल्यानंतर आता विधानसभेचे उपाध्यक्ष म्हणून राज्याच्या राजकारणात महत्त्वाची भूमिका बजावत आहेत. त्यांच्या कार्यामुळे पिंपरी चिंचवडच्या विकासाला नवे गती मिळणार असल्याचा विश्वास अजित पवार यांनी व्यक्त केला आहे.
या सत्कार समारंभाला खासदार श्रीरंग बारणे, माजी खासदार अमर साबळे, आमदार शंकर जगताप, महेश लांडगे, महिला नेत्या उमाताई खापरे, तसेच भाजप, आरपीआय, शिवसेना आणि इतर मित्र पक्षांचे शहराध्यक्ष, सामाजिक संस्थांचे प्रतिनिधी, महिला आणि युवक संघटनांचे पदाधिकारी, बचत गट, आणि हजारो नागरिक उपस्थित राहणार आहेत.
या पार्श्वभूमीवर पिंपरी चिंचवडमधील प्रमुख नागरी समस्या सोडवण्यासाठी हा राजकीय सन्मान उपयुक्त ठरणार आहे. पाणीपुरवठा, सार्वजनिक स्वच्छता, पीएमपीएमएल सेवा, मेट्रो विस्तार, वैद्यकीय सुविधा, गोरगरीबांसाठी घरकुल प्रकल्प अशा अनेक मुद्द्यांवर निर्णय घेण्यास चालना मिळेल, अशी अपेक्षा बहल यांनी व्यक्त केली.
महाराष्ट्र विधानमंडळ अधिकृत वेबसाइट:
राजकीय एकवाक्यता आणि विकासाभिमुख नेतृत्व
राज्यात आणि केंद्रात एका विचारसरणीचे सरकार असल्यामुळे पिंपरी चिंचवडच्या विकासाला नवी दिशा मिळेल, असा विश्वास व्यक्त करण्यात आला. अण्णा बनसोडे यांच्या माध्यमातून शहराच्या मागण्या शासन दरबारी प्रभावीपणे मांडल्या जातील, हे निश्चित आहे.
हा नागरी सत्कार केवळ व्यक्तीचा नव्हे, तर पिंपरी चिंचवड शहराच्या विकासाची नवी पायरी चढण्याचा क्षण असल्याची भावना नागरिकांमध्ये व्यक्त होत आहे.
