गुलकंद सिनेमा टीमसोबत चिंचवडमध्ये धमाल गप्पांची संध्याकाळ
चिंचवड (प्रतिनिधी) – जगभरातील मराठी रसिकांच्या मनावर राज्य करणाऱ्या ‘महाराष्ट्राची हास्यजत्रा’ मालिकेची टीम आणि नव्याने येणाऱ्या गुलकंद चित्रपटाच्या कलाकारांसोबत थेट दिलखुलास गप्पा करण्याचा कार्यक्रम आज, सोमवारी (२८ एप्रिल) चिंचवड येथे पार पडणार आहे.
दिशा सोशल फाऊंडेशनच्या वतीने आयोजित या कार्यक्रमात प्रसाद ओक, समीर चौघुले, सई ताम्हणकर, ईशा डे, लेखक-दिग्दर्शक सचिन मोटे आणि सचिन गोस्वामी यांची उपस्थिती लाभणार आहे.
हा खास कार्यक्रम सायंकाळी ५.३० वाजता प्रा. रामकृष्ण मोरे नाट्यगृह, चिंचवड येथे होणार असून, प्रवेश विनामूल्य आहे. काही जागा राखीव असल्याने प्रथम येणाऱ्यांना प्राधान्य दिले जाणार आहे. आयोजकांनी वेळेवर उपस्थित राहण्याचे आवाहन केले आहे.
गुलकंद चित्रपट – हास्याचा गोडसर सुगंध
सोनी मराठीवरील ‘महाराष्ट्राची हास्यजत्रा’ने लोकप्रियतेचे उच्चशिखर गाठल्यानंतर, वेटक्लाऊड प्रॉडक्शनने ‘गुलकंद ‘ या कौटुंबिक, हलक्याफुलक्या विनोदी चित्रपटाची निर्मिती केली आहे. १ मे रोजी सर्वत्र प्रदर्शित होणाऱ्या ‘गुलकंद चित्रपटामध्ये प्रसाद ओक, समीर चौघुले, सई ताम्हणकर आणि ईशा डे यांच्या दमदार भूमिका पाहायला मिळणार आहेत.
चित्रपटाचे लेखन आणि दिग्दर्शन सचिन मोटे आणि सचिन गोस्वामी या लोकप्रिय जोडीने केले आहे.
गुलकंद चित्रपटाचा ट्रेलर पाहण्यासाठी येथे क्लिक करा
कलाकारांचा थेट संवाद – एक संस्मरणीय अनुभव
या खास गप्पांच्या कार्यक्रमात ‘गुलकंद चित्रपटाच्या’च्या टीमसोबत प्रेक्षकांना थेट संवाद साधण्याची संधी मिळणार आहे. कलाकार त्यांच्या शूटिंगच्या अनुभवाबरोबरच काही मजेशीर प्रसंग आणि पडद्यामागच्या गमतीजमती शेअर करणार आहेत.
चिंचवडसारख्या सांस्कृतिक नगरीत अशा मोठ्या कलाकारांना प्रत्यक्ष भेटण्याची संधी मिळणे हे स्थानिकांसाठी नक्कीच एक खास क्षण ठरणार आहे.
हे हि वाचावे
पिंपरी चिंचवड शिक्षण विभाग वार्षिक स्नेह उत्सव 2025 : गुणवत्तेच्या दिशेने भक्कम पावलं!
गुलकंद चित्रपट – कौटुंबिक मनोरंजनाची मेजवानी
‘गुलकंद ‘ प्रेक्षकांना निखळ हसवण्याबरोबरच, प्रेम आणि कुटुंब यांचे महत्व अधोरेखित करणार आहे. संपूर्ण कुटुंबासोबत पाहण्यासारखा, सहज आणि गोड अनुभव देणारा हा सिनेमा प्रत्येकाच्या मनात आपली खास जागा निर्माण करणार, यात शंका नाही.
