NEP 2025 Job Opportunities
एनईपी मुळे रोजगार संधींना नवे दार – डॉ. शैलेंद्र देवळाणकर
स्पर्धा परीक्षा नाही, तरीही उत्तम करिअर! जाणून घ्या नवा पर्याय
विद्यार्थ्यांसाठी सुवर्णसंधी! आता इंटर्नशिप द्वारे मिळवा अनुभव आणि शिष्यवृत्ती
पीसीसीओईमध्ये करिअर कट्टा विभागीय पुरस्कार वितरण सोहळा संपन्न
पिंपरी, पुणे (दि. १ एप्रिल २०२५) – नवीन राष्ट्रीय शैक्षणिक धोरण (एनईपी) अंतर्गत युवकांसाठी रोजगार संधींमध्ये लक्षणीय वाढ होईल. ग्रामपंचायतपासून ते बहुराष्ट्रीय कंपन्यांपर्यंत इंटर्नशिपची संधी उपलब्ध होईल. यामुळे विद्यार्थ्यांना प्रत्यक्ष कामाचा अनुभव मिळेल आणि त्यांना शिष्यवृत्तीचा लाभही मिळू शकतो. यामुळे आर्थिक स्वावलंबन सोपे होईल आणि रोजगार निर्मितीला चालना मिळेल, असा विश्वास महाराष्ट्र शासनाच्या उच्च व तंत्र शिक्षण विभागाचे संचालक डॉ. शैलेंद्र देवळाणकर यांनी व्यक्त केला.
पीसीईटीच्या पिंपरी चिंचवड कॉलेज ऑफ इंजिनीअरिंग (पीसीसीओई) येथे “करिअर कट्टा विभागीय पुरस्कार वितरण सोहळा व एक दिवसीय कार्यशाळा २०२५” मोठ्या उत्साहात पार पडला. या वेळी करिअर कट्टा विशेषांकाचे प्रकाशन करण्यात आले. या कार्यक्रमाला महाराष्ट्र आर्थिक विकास महामंडळाचे सचिन इटकर, पीसीईटीचे कार्यकारी संचालक डॉ. गिरीश देसाई, तसेच महाराष्ट्र माहिती तंत्रज्ञान सहाय्यता केंद्राचे अध्यक्ष यशवंत शितोळे यांसारख्या मान्यवरांनी हजेरी लावली.
रोजगार निर्मितीला चालना देणारे एनईपी धोरण
डॉ. शैलेंद्र देवळाणकर यांनी मार्गदर्शन करताना सांगितले की, “सध्या बहुतांश विद्यार्थी स्पर्धा परीक्षा किंवा प्राध्यापक म्हणून करिअर घडवण्याच्या दिशेने विचार करतात. मात्र, एनईपीच्या अंतर्गत करिअर कट्टा उपक्रमामुळे विद्यार्थ्यांना स्पर्धा परीक्षांसोबतच विविध आस्थापनांमध्ये इंटर्नशिपच्या माध्यमातून प्रत्यक्ष अनुभव घेता येईल. त्यामुळे त्यांची रोजगार क्षमता वाढेल आणि देशाच्या औद्योगिक व सेवा क्षेत्राला कुशल मनुष्यबळ उपलब्ध होईल.”
या धोरणामुळे केवळ शहरी भागच नव्हे, तर ग्रामीण भागातही रोजगार निर्मितीला चालना मिळेल. प्रशिक्षित मनुष्यबळाच्या मदतीने उत्पादन आणि सेवा क्षेत्रात वाढ होईल, परिणामी राष्ट्रीय जीडीपी वाढण्यास मदत होईल.
करिअर कट्टा विभागीय पुरस्कार वितरण सोहळा
कार्यक्रमात पुणे, नाशिक, अहिल्यानगर जिल्ह्यांतील नामांकित महाविद्यालये, प्राचार्य, प्राध्यापक, तालुका व महाविद्यालय समन्वयक यांना विशेष पुरस्कार देऊन गौरविण्यात आले. विभागीय प्राचार्य प्रवर्तक, डॉक्युमेंटरी स्पर्धा विजेते आणि करिअर कट्टा प्रशिक्षक म्हणून निवड झालेल्या प्राध्यापकांचा देखील सन्मान करण्यात आला.
यावेळी महाराष्ट्र राज्य उच्च व तंत्र शिक्षण विभाग, महाराष्ट्र माहिती तंत्रज्ञान सहायता केंद्र आणि पीसीईटीच्या संयुक्त विद्यमाने विविध तांत्रिक आणि करिअर मार्गदर्शन विषयक कार्यशाळा घेण्यात आल्या.
हे हि वाचावे
दिल्लीतील एचआर कॉन्क्लेव्ह: एआय तंत्रज्ञानाने क्रांती, परंतु मानवी संवेदना जपण्याचे आवाहन !
प्रमुख मान्यवरांचे अभिनंदन आणि शुभेच्छा
पीसीईटीचे अध्यक्ष ज्ञानेश्वर लांडगे, उपाध्यक्षा पद्माताई भोसले, सचिव विठ्ठल काळभोर, खजिनदार शांताराम गराडे, तसेच पीसीयुचे कुलपती हर्षवर्धन पाटील आणि उद्योजक नरेंद्र लांडगे यांनी पुरस्कार विजेत्या प्राचार्य व प्राध्यापकांचे अभिनंदन केले.
कार्यक्रमाचे प्रास्ताविक यशवंत शितोळे यांनी केले, सूत्रसंचालन प्रा. आनंद गांगुर्डे यांनी केले तर आभार संजय खिल्लारे यांनी मानले.
एनईपी आणि भविष्यातील संधी
राष्ट्रीय शैक्षणिक धोरणाच्या प्रभावामुळे विद्यार्थी कुशल मनुष्यबळ म्हणून घडतील आणि त्यांना स्थानिक तसेच आंतरराष्ट्रीय स्तरावर रोजगाराच्या असंख्य संधी प्राप्त होतील. करिअर कट्टा हा उपक्रम या परिवर्तनाला गती देईल, अशी अपेक्षा तज्ज्ञांनी व्यक्त केली.
तज्ञांचे अभ्यास अहवाल पाहण्यासाठी येथे क्लिक करा
महाराष्ट्रातील नवीन रोजगार संधी
महाराष्ट्र राज्यात नवीन रोजगार संधी मोठ्या प्रमाणात उपलब्ध होत आहेत. राष्ट्रीय शैक्षणिक धोरण (NEP 2025) अंतर्गत विद्यार्थ्यांना सरकारी आणि खाजगी क्षेत्रात इंटर्नशिप आणि रोजगाराच्या नव्या संधी मिळणार आहेत. उद्योग, माहिती तंत्रज्ञान, आरोग्य सेवा, कृषी आणि स्टार्टअप क्षेत्रात रोजगार निर्मिती वेगाने होत आहे.
शासकीय योजना आणि कौशल्य विकास:
महाराष्ट्र सरकारने मुख्यमंत्री रोजगार निर्मिती योजना, महाजॉब्स पोर्टल, आणि PMKVY कौशल्य विकास योजना सुरू केल्या आहेत. त्यामुळे तरुणांना उद्योग, उत्पादन आणि सेवा क्षेत्रात संधी मिळत आहेत.
उद्योग आणि स्टार्टअप संधी:
पुणे, मुंबई, नाशिक आणि औरंगाबादसारख्या शहरांमध्ये IT, ऑटोमोबाईल आणि फार्मा क्षेत्रात मोठ्या प्रमाणावर रोजगार उपलब्ध होत आहेत. तसेच, स्टार्टअप्स आणि MSME क्षेत्रातील संधी देखील वाढत आहेत. डिजिटल मार्केटिंग, डेटा अॅनालिटिक्स आणि क्लाउड टेक्नॉलॉजी यासारख्या नव्या कौशल्यांना मागणी आहे.
शेती आणि ग्रामीण रोजगार:
शेतीपूरक व्यवसाय, अन्न प्रक्रिया उद्योग आणि ग्रामीण पर्यटनामुळे ग्रामीण भागातही रोजगार संधी निर्माण होत आहेत. महिलांसाठी स्वयंरोजगाराच्या नव्या संधी उपलब्ध होत असून, बचत गटांच्या माध्यमातून लघुउद्योगांना चालना दिली जात आहे.
निर्णायक बदल आणि भविष्यातील संधी:
ई-कॉमर्स, ग्रीन एनर्जी आणि मॅन्युफॅक्चरिंग क्षेत्रांतही मोठी रोजगार वाढ अपेक्षित आहे. पर्यटन आणि हॉस्पिटॅलिटी क्षेत्रातही रोजगार संधी वाढत आहेत. कौशल्य आधारित शिक्षण आणि सरकारी योजना यांचा समन्वय केल्यास महाराष्ट्र लवकरच रोजगार निर्मितीच्या आघाडीवर राहील. महाराष्ट्रातील युवकांना विविध क्षेत्रांत सुवर्णसंधी मिळणार असून, रोजगार वाढीसाठी हे पाऊल महत्त्वाचे ठरणार आहे.
