पिंपरी, १८ जून २०२५ : टाळ-मृदुंगांच्या गजरात, भक्तीमय वातावरणात पिंपरी चिंचवड महानगरपालिकेने उभारलेल्या जगद्गुरू संत तुकाराम महाराज संतपीठ येथील प्रेक्षागृह व कलादालनाचे भव्य लोकार्पण मुख्यमंत्री देवेंद्र फडणवीस यांच्या हस्ते उत्साहात पार पडले. या कार्यक्रमात शहरातील अनेक मान्यवर, लोकप्रतिनिधी, अधिकारी आणि नागरिक मोठ्या संख्येने उपस्थित होते.
मुख्यमंत्र्यांचे स्वागत पारंपरिक टाळ-मृदुंगांच्या निनादात करण्यात आले. त्यांनी संत मल्हारपंत कुलकर्णी गायन कक्ष, संत सोनबा ठाकूर पखवाज कक्ष, व पं. अरविंद मुळगांवकर तबला कक्ष यांना भेट देऊन विद्यार्थ्यांच्या सादरीकरणाचे कौतुक केले. “तुमचे गायन आणि वादन अप्रतिम आहे,” असे सांगत मुख्यमंत्री स्वतः विद्यार्थ्यांसोबत फोटोही काढले.
कार्यक्रमात मुख्यमंत्री फडणवीस यांचा गाथा, पगडी, उपरणे, चिपळ्या आणि वीणा यांसारख्या भक्तीप्रतीकांनी अनोखा सन्मान करण्यात आला. यावेळी “अक्षर संस्कार” या विविध भाषांतील संत साहित्य पुस्तकमालिकेचे प्रकाशनही त्यांच्या हस्ते करण्यात आले.
जगद्गुरू संत तुकाराम महाराज संतपीठ या ऐतिहासिक प्रकल्पात विद्यार्थ्यांना भक्ती, संगीत व साहित्याचे प्रशिक्षण दिले जाते. संचालक डॉ. सदानंद मोरे यांनी संतपीठाची माहिती देताना पिंपरी चिंचवड महापालिकेच्या पुढाकाराचे विशेष कौतुक केले.
या प्रसंगी खासदार श्रीरंग बारणे, आमदार महेश लांडगे, आयुक्त शेखर सिंह, आणि इतर मान्यवर उपस्थित होते. सूत्रसंचालन जनसंपर्क अधिकारी प्रफुल्ल पुराणिक यांनी केले.
संतपीठात आयोजित छोटेखानी नाटिका आणि माहितीपटाने उपस्थितांचे मन जिंकले. यामधून संत साहित्याची आधुनिक पिढीला झालेली ओळख विशेषत्वाने अधोरेखित झाली.
वृक्षारोपणाचा शुभारंभ मुख्यमंत्री फडणवीस यांच्या हस्ते…
या कार्यक्रमातच १.५० लाख देशी वृक्ष लागवड मोहिमेचा शुभारंभ अजानवृक्ष लावून करण्यात आला. ही मोहिम पिंपरी चिंचवड महानगरपालिकेच्या पर्यावरण संवर्धनासाठी घेतलेला महत्त्वाचा टप्पा मानला जात आहे.
