औद्योगिक नगरीतून सांस्कृतिक नगरीकडे वाटचाल – पिंपरी चिंचवडमध्ये होणार नाट्य संकुल

पिंपरी चिंचवडमध्ये उभारले जाणार नाट्य संकुल – उपमुख्यमंत्री अजित पवार यांची घोषणा

पिंपरी चिंचवड, दि. २४ ऑगस्ट – मराठी नाटक हे केवळ मनोरंजनाचे माध्यम नसून, मराठी संस्कृतीचा श्वास आहे. या संस्कृतीला अधिक भक्कम करण्यासाठी पिंपरी चिंचवड नाट्य संकुल उभारण्याची घोषणा उपमुख्यमंत्री अजित पवार यांनी केली. अखिल भारतीय मराठी नाट्य परिषदेच्या २९ व्या वर्धापन दिनानिमित्त प्रा. रामकृष्ण मोरे नाट्यगृह येथे आयोजित पुरस्कार सोहळ्यात ते बोलत होते.

उद्योगनगरी म्हणून ओळखल्या जाणाऱ्या पिंपरी चिंचवडचा सांस्कृतिक चेहरा मजबूत करण्यासाठी हे नाट्य संकुल महत्त्वाचे ठरेल, असे अजित पवार म्हणाले. त्यांनी महापालिका आयुक्त शेखर सिंह यांना जागा उपलब्ध करून देण्याच्या सूचना देणार असल्याचेही जाहीर केले.

मान्यवरांचा सन्मान आणि पुरस्कार वितरण

या सोहळ्यात अखिल भारतीय मराठी नाट्य परिषदेच्या मध्यवर्ती संघटनेचे विश्वस्त अशोक हांडे प्रमुख पाहुणे म्हणून उपस्थित होते. पिंपरी चिंचवड शाखेचे अध्यक्ष भाऊसाहेब भोईर यांच्यासह विविध मान्यवर व्यासपीठावर उपस्थित होते.

यावेळी विविध कलावंतांना विशेष पुरस्कार देऊन गौरवण्यात आले.

कै. बालगंधर्व पुरस्कार – ज्येष्ठ नाट्यसंगीतकार श्री. ज्ञानेश पेंढारकर

आचार्य अत्रे पुरस्कार – अभिनेते व लेखक संकर्षण कऱ्हाडे

कै. अरुण सरनाईक पुरस्कार – अभिनेता-दिग्दर्शक प्रवीण तरडे

कै. स्मिता पाटील पुरस्कार – कवयित्री व अभिनेत्री स्पृहा जोशी

कै. जयवंत दळवी पुरस्कार – लेखक अरविंद जगताप

जीवन गौरव पुरस्कार – ज्येष्ठ गायक पं. सुरेश साखवळकर

याशिवाय सुवर्णा काळे, रति देशमुख, प्रांजल जाधव यांसह राज्यनाट्य स्पर्धा २०२४ मधील विजेत्यांचा विशेष सन्मान करण्यात आला.

अजित पवारांचा भावनिक संदर्भ

कलावंतांच्या कामगिरीचे कौतुक करताना अजित पवारांनी संकर्षण कऱ्हाडे यांच्या कवितेचा उल्लेख केला. “मी शेतकरी असून आजही शेतात राबतो. लोकांनी माझ्या स्पष्टवक्तेपणावर प्रश्नचिन्ह उपस्थित केले होते, पण जनतेला तेच आवडले,” असे ते म्हणाले.

त्यांनी संयुक्त महाराष्ट्र चळवळीत यशवंतराव चव्हाण यांचे योगदान स्मरून कलाकारांच्या योगदानाला अभिवादन केले. “कलाकारांनी राज्याची संस्कृती जपली आहे. राज्यकर्त्यांवर ती जपण्याची जबाबदारी आहे,” असेही त्यांनी सांगितले.

शहरातील वाहतूक समस्यांवर उपाययोजना

पुणे आणि पिंपरी चिंचवडमधील वाढत्या वाहतूक कोंडीवर भाष्य करताना उपमुख्यमंत्री पवार म्हणाले, “शहरात मेट्रो, उड्डाणपूल, रिंगरोड व राष्ट्रीय महामार्गाचे जाळे उभे राहत आहे. लवकरच नागरिकांना वाहतूक कोंडीपासून दिलासा मिळेल.”

नाट्य संकुलाची गरज अधोरेखित

या कार्यक्रमाचे प्रास्ताविक करताना भाऊसाहेब भोईर यांनी पिंपरी चिंचवड नाट्य संकुल उभारण्याची मागणी केली. शहरातील वाढती सांस्कृतिक चळवळ आणि मराठी रंगभूमीचा वारसा यासाठी हे संकुल आवश्यक असल्याचे त्यांनी नमूद केले.

सत्काराला उत्तर देताना कलाकारांनीही आपल्या भावना व्यक्त केल्या. कार्यक्रमाचे सूत्रसंचालन चित्रा खरे यांनी केले तर आभार प्रदर्शन सुहास जोशी यांनी केले.