पिंपरी-चिंचवड | प्रतिनिधी
भगवा ध्वजांची लाट, ढोल-ताशांचा निनाद, मर्दानी खेळांची थरारक प्रात्यक्षिके आणि शिवभक्तांचा जयघोष… मोशी येथे भरलेल्या ऐतिहासिक सोहळ्यात धर्मवीर छत्रपती संभाजी महाराजांना गगनभेदी मानवंदना अर्पण करण्यात आली. स्टॅच्यू ऑफ हिंदुभूषणच्या साक्षीने झालेल्या या कार्यक्रमाला हजारो शिव-शंभू भक्तांनी उपस्थित राहून अविस्मरणीय क्षणांचा साक्षीदार ठरले.
ढोल-ताशांचा गजर आणि शिवभक्तांची गर्दी
महाराष्ट्रभरातून आलेल्या शंभरहून अधिक नामांकित ढोल-ताशा पथकांनी एकत्रित वादन करून इतिहास रचला. तब्बल तीन हजार ढोल, हजाराहून अधिक ताशा आणि पाचशे भगवे ध्वज यांच्या गजरात शंभूराजांना अभिवादन करण्यात आले. पावसानेही या सोहळ्यात हजेरी लावत उत्साह अधिकच द्विगुणित केला.
शिवगर्जना, मर्दानी खेळ आणि संतपीठाचे कीर्तन
अवधूत गांधी यांच्या शिवगीतांनी वातावरण भारावले, तर मर्दानी खेळांच्या प्रात्यक्षिकांनी प्रेक्षकांना थरारून टाकले. संतपीठाच्या कीर्तनातून शिव-शंभूंचे विचार प्रभावीपणे मांडण्यात आले. लहान बालशिवभक्ताची गर्जना देखील सर्वांचे लक्ष वेधून घेत होती.
हिंदुभूषण स्मारक ट्रस्टची उद्दिष्टे
या प्रसंगी स्मारकाच्या उद्दिष्टांची घोषणा प्रा. इंद्रजीत भोसले यांनी केली. त्यांनी सांगितले की, स्टॅच्यू ऑफ हिंदुभूषण हे स्मारक फक्त शिल्प नसून भावी पिढीपर्यंत छत्रपती शिवाजी महाराज व धर्मवीर संभाजी महाराज यांचे विचार पोहोचवण्याचे माध्यम ठरेल. स्वातंत्र्य, पराक्रम, धर्मनिष्ठा आणि स्वराज्य रक्षणाचा संदेश तरुण पिढीपर्यंत पोहोचवण्यासाठी ट्रस्ट काम करणार आहे.
लंडन बुक ऑफ रेकॉर्डमध्ये नोंद
जगातील सर्वांत उंच स्मारक म्हणून स्टॅच्यू ऑफ हिंदुभूषणची नोंद आधीच झाली आहे. आता ढोल-ताशा वादनाद्वारे अर्पण करण्यात आलेल्या या मानवंदनेची नोंद देखील लंडन बुक ऑफ रेकॉर्डमध्ये झाली. या निमित्ताने ट्रस्टच्या पदाधिकाऱ्यांना गौरवचिन्ह व प्रमाणपत्र देऊन सन्मानित करण्यात आले.
महेश लांडगे यांचा आक्रमक इशारा
या कार्यक्रमाला मार्गदर्शन करताना ट्रस्टचे अध्यक्ष आमदार महेश लांडगे यांनी “धर्मनिष्ठा आणि कर्मनिष्ठा हेच माझे ब्रीद आहे,” असे सांगत समाजातील अन्यायाविरोधात आक्रमक भूमिका घेण्याचा इशारा दिला. ‘‘माता-भगिनींवर अन्याय करणाऱ्या नराधमांचा चौरंग्या केल्याशिवाय राहणार नाही,’’ असे ठाम विधान त्यांनी केले.
चोख नियोजनामुळे यशस्वी सोहळा
पार्किंग, भोजन, पिण्याचे पाणी व वैद्यकीय सुविधा यांसह सर्व सोयी उपलब्ध करून दिल्यामुळे हजारोंच्या गर्दीतही हा सोहळा शिस्तबद्ध पार पडला. पुणे, पिंपरी-चिंचवडसह राज्याच्या कानाकोपऱ्यातून शिवभक्तांनी हजेरी लावली. आतषबाजीने समारोप होताच, दाही दिशा ‘‘शंभुराजे शंभुराजे’’ या गजराने दुमदुमून गेल्या.
