पिंपरी-चिंचवड | प्रतिनिधी
पिंपरी-चिंचवड महानगरपालिकेच्या आगामी निवडणुकांच्या पार्श्वभूमीवर प्रभाग क्रमांक १० मध्ये राजकीय वातावरण तापू लागले आहे. भाजपकडून माजी उपमहापौर व कामगार नेते केशव घोळवे यांचे तिकीट कापण्यात आल्याने श्रमिक एकता महासंघाने तीव्र नाराजी व्यक्त करत भाजपविरोधात उघड भूमिका घेतली आहे. या निर्णयाच्या निषेधार्थ आज शहरात आयोजित पत्रकार परिषदेमुळे निवडणूक रणधुमाळीत नवा वळण निर्माण झाला आहे.
पत्रकार परिषदेत श्रमिक एकता महासंघाचे अध्यक्ष किशोर सोमवंशी, जनरल सेक्रेटरी रोहित पवार, प्रमुख सल्लागार मारुतीराव जगदाळे, दिलीपराव पवार यांच्यासह विविध कामगार संघटनांचे पदाधिकारी उपस्थित होते. यावेळी महासंघाने स्पष्ट शब्दांत सांगितले की, प्रभाग १० मध्ये भाजपविरोधात श्रमिक एकता महासंघाचा उद्रेक हा कोणत्याही व्यक्तीपुरता मर्यादित नसून संपूर्ण कामगार वर्गाच्या आत्मसन्मानाचा प्रश्न आहे.
महासंघाच्या पदाधिकाऱ्यांनी सांगितले की, केशव घोळवे गेल्या २५ वर्षांपासून पिंपरी-चिंचवड शहरात कामगार चळवळीचे विश्वासार्ह नेतृत्व म्हणून ओळखले जातात. शोषित, पीडित, संघटित-असंघटित कामगार, सेवानिवृत्त कर्मचारी आणि कष्टकरी वर्गासाठी त्यांनी सातत्याने संघर्ष केला आहे. ऊसतोड कामगार कुटुंबातून पुढे आलेल्या या नेत्याने स्वतःचे संपूर्ण आयुष्य कामगारांच्या हक्कांसाठी झोकून दिले आहे.
थरमॅक्स कामगार संघटनेचे सलग तीन वेळा अध्यक्ष म्हणून काम करताना त्यांनी सर्वोच्च वेतन करार, सामाजिक सुरक्षा योजना आणि कामगार कल्याणकारी उपक्रम प्रभावीपणे राबवले. श्रमिक एकता महासंघाच्या माध्यमातून त्यांनी पुणे जिल्ह्यासह राज्यभरातील अनेक संघटनांना दिशा दिली असल्याचेही या वेळी नमूद करण्यात आले.
२०१७ च्या महापालिका निवडणुकीत भाजपच्या वरिष्ठ नेत्यांच्या नेतृत्वाखाली केशव घोळवे यांना उमेदवारी देण्यात आली होती आणि कामगारांच्या एकजुटीमुळे ते मोठ्या मताधिक्याने विजयी झाले होते. नगरसेवक व उपमहापौर म्हणून त्यांनी महा मेट्रो, पाणीपुरवठा योजना, वेस्ट-टू-एनर्जी प्रकल्प, वाय.सी.एम. रुग्णालयातील वैद्यकीय महाविद्यालय, ई-बस सेवा आणि प्रधानमंत्री आवास योजनेअंतर्गत घरकुल यांसारख्या महत्त्वाच्या विकासकामांना गती दिली.
प्रभाग १० मध्ये दिव्यांग भवन, शाहू-फुले-आंबेडकर सृष्टी, विविध स्मारके, काँक्रीट रस्ते, उद्याने, स्मार्ट सिटी अंतर्गत पायाभूत सुविधा, पाणी व ड्रेनेज लाईन्स यांसारखी कामे मार्गी लागली. कोरोना महामारीच्या काळात त्यांनी २४ तास सेवा देत रुग्ण, सफाई कर्मचारी, आशा वर्कर्स आणि कंत्राटी कामगारांसाठी भक्कम पाठबळ दिले.
असे असतानाही “हे नेतृत्व भविष्यात मोठे होऊ शकते” या भीतीपोटी तिकीट कापण्यात आल्याचा आरोप महासंघाने केला. शहरातील सुमारे १५० कंपन्यांमधील ३५ हजार सदस्य आणि त्यांच्या कुटुंबांसह सुमारे १.४ लाख लोक या निर्णयामुळे अस्वस्थ असल्याचे सांगण्यात आले. त्यामुळे प्रभाग १० मध्ये भाजपविरोधात श्रमिक एकता महासंघाचा उद्रेक निवडणुकीत निर्णायक ठरू शकतो, असा अंदाज व्यक्त केला जात आहे.
महासंघाने भाजपचा जाहीर निषेध करत मतदारांना आवाहन केले की, पैसा व दडपशाहीच्या राजकारणाला मतदानातून उत्तर द्यावे. या घडामोडींमुळे पिंपरी-चिंचवडच्या राजकारणात मोठी खळबळ उडाली असून, येत्या निवडणुकीत याचे पडसाद उमटण्याची दाट शक्यता आहे.
