पिंपरी, दि. १८ फेब्रुवारी २०२६: ‘जय भवानी, जय शिवाजी’ आणि ‘हर हर महादेव’च्या गजरात निगडी येथील नियोजित महापौर निवास परिसर दुमदुमून गेला. पिंपरी चिंचवड महानगरपालिकाच्या वतीने छत्रपती शिवाजी महाराज जयंतीनिमित्त आयोजित ‘विचार प्रबोधन पर्वा’अंतर्गत सादर करण्यात आलेल्या ‘शिवगर्जना’ या भव्य महानाट्याच्या पहिल्याच प्रयोगाला शिवप्रेमींनी मोठ्या संख्येने उपस्थित राहून भरभरून दाद दिली.
महापौर रवि लांडगे यांच्या हस्ते महानाट्याचा शुभारंभ करण्यात आला. यावेळी उपमहापौर शर्मिला बाबर, सत्तारूढ पक्षनेते प्रशांत शितोळे, नगरसदस्य अमित गावडे, राजू मिसाळ, अभिषेक बारणे, चेतन भुजबळ, शैलजा मोरे, अर्चना कारंडे, माजी नगरसदस्य मारुती भापकर, अतिरिक्त आयुक्त विक्रांत बगाडे, उपआयुक्त अण्णा बोदडे, जनता संपर्क अधिकारी प्रफुल्ल पुराणिक तसेच सामाजिक कार्यकर्ते व नागरिक मोठ्या संख्येने उपस्थित होते.
२५० हून अधिक कलाकारांचा सहभाग
मा. राष्ट्रपती महोदयांसमोर यापूर्वी सादर झालेल्या या भव्य महानाट्यात सुमारे २५० हून अधिक कलाकारांनी सहभाग नोंदवला. घोडे, उंट, पारंपरिक वेशभूषा, भव्य नेपथ्य, अत्याधुनिक प्रकाशयोजना, प्रभावी ध्वनीसंयोजन आणि नेत्रदीपक आतषबाजीमुळे प्रत्येक प्रसंग जिवंत झाल्याची अनुभूती प्रेक्षकांना मिळाली. प्रत्येक दृश्यानंतर टाळ्यांचा कडकडाट आणि जयघोषाने संपूर्ण परिसर भारावून गेला.
शिवचरित्रातील ऐतिहासिक प्रसंगांचे प्रभावी सादरीकरण
महानाट्यात छत्रपती शिवाजी महाराजांच्या जन्मापूर्वीचा सामाजिक-राजकीय कालखंड, बालपण, संत तुकाराम महाराजांसोबतची ऐतिहासिक भेट, तोरणा विजय, स्वराज्य स्थापनेचा संघर्ष, शेतकऱ्यांसाठीचे आज्ञापत्र, प्रतापगड मोहीम, पन्हाळगड वेढा व सुटका, आरमार उभारणी, पुरंदरचा तह, आग्रा भेट, नरवीर तानाजी मालुसरे यांचा कोंढाणा विजय आणि भव्य शिवराज्याभिषेक सोहळा अशा अनेक प्रसंगांचे सजीव चित्रण करण्यात आले.
या सादरीकरणामुळे उपस्थितांमध्ये राष्ट्राभिमानाची भावना जागृत झाली. अनेक प्रेक्षक उभे राहून कलाकारांना दाद देताना दिसले.
सुयोग्य नियोजन आणि सुरक्षा व्यवस्था
कार्यक्रमस्थळी नागरिकांसाठी सुयोग्य बैठक व्यवस्था, वाहतूक नियोजन आणि आवश्यक नागरी सुविधा उपलब्ध करून देण्यात आल्या होत्या. मुख्य सुरक्षा अधिकारी उदय जरांडे व सहाय्यक सुरक्षा अधिकारी प्रमोद निकम यांच्या अधिपत्याखाली कायदा व सुव्यवस्था राखण्यासाठी २० सुरक्षारक्षकांची नेमणूक करण्यात आली होती.
आणखी दोन प्रयोगांची संधी
‘शिवगर्जना’ या महानाट्याचे आणखी दोन प्रयोग १८ व १९ फेब्रुवारी २०२६ रोजी सायंकाळी ६.३० वाजता याच ठिकाणी सादर होणार आहेत. या भव्य महानाट्यप्रयोगाचा लाभ घ्यावा, असे आवाहन महानगरपालिकेच्या वतीने करण्यात आले आहे.
महापौरांचे मत
यावेळी बोलताना महापौर रवि लांडगे म्हणाले,
“‘शिवगर्जना’ या महानाट्याच्या माध्यमातून छत्रपती शिवाजी महाराजांच्या पराक्रमाची, दूरदृष्टीची आणि सुशासनाच्या तत्त्वांची प्रभावी मांडणी नव्या पिढीसमोर होत आहे. इतिहास केवळ वाचण्याचा विषय नसून तो अनुभवण्याचा आहे. अशा सादरीकरणातून युवकांना स्वराज्याच्या मूल्यांची प्रेरणा मिळेल आणि राष्ट्राभिमान अधिक दृढ होईल, असा विश्वास आहे.”
