चिंचवड (प्रतिनिधी): पिंपरी चिंचवड महानगरपालिका यांच्या चिंचवड येथील नवीन प्रशासकीय इमारतीच्या बांधकामस्थळी दि. १६ फेब्रुवारी २०२६ रोजी दुपारी ४ वाजता विरोधी पक्षनेते भाऊसाहेब सोपानराव भोईर यांनी सहकाऱ्यांसह पाहणी दौरा केला. यावेळी संबंधित अधिकाऱ्यांकडून इमारतीच्या कामकाजाची सविस्तर माहिती घेण्यात आली.
पाहणीदरम्यान भाऊसाहेब भोईर यांनी सांगितले की, पिंपरी-चिंचवड शहराच्या सर्वांगीण विकासात स्व. उपमुख्यमंत्री अजितदादा पवार यांचे मोठे योगदान आहे. शहराच्या पायाभूत सुविधांपासून प्रशासकीय बळकटीकरणापर्यंत त्यांनी दूरदृष्टी ठेवून अनेक महत्त्वपूर्ण निर्णय घेतले. त्यामुळे त्यांची ओळख शहराचे “शिल्पकार” म्हणून आहे.
याच पार्श्वभूमीवर नवीन प्रशासकीय इमारतीच्या मुख्य प्रवेशद्वारासमोर, इमारतीच्या भव्यतेला साजेसा आणि शहराला प्रेरणा देणारा स्व. अजितदादा पवार यांचा पूर्णाकृती भव्य पुतळा उभारण्याचा निर्धार करण्यात आल्याचे त्यांनी जाहीर केले. यासाठी वास्तुशिल्पतज्ज्ञ, तांत्रिक व्यवस्थापन टीम आणि प्रोजेक्ट आर्किटेक्ट यांच्याशी लवकरच सविस्तर चर्चा करून प्रस्ताव पुढे नेण्यात येणार असल्याचेही त्यांनी स्पष्ट केले.
नवीन प्रशासकीय इमारतीचे बांधकाम व आवश्यक सुविधा मार्च २०२७ पर्यंत पूर्ण होणार असल्याची माहिती संबंधित अधिकाऱ्यांनी यावेळी दिली. आधुनिक सोयी-सुविधांनी सुसज्ज अशी ही इमारत शहराच्या प्रशासकीय कार्यक्षमतेत भर घालणार असल्याचेही सांगण्यात आले.
या पाहणी दौऱ्यावेळी माजी शहराध्यक्ष अजित गव्हाणे, मा. विरोधी पक्षनेते विठ्ठल ऊर्फ नाना काटे, माजी नगरसेवक मोरेश्वर भोंडवे आदी मान्यवर उपस्थित होते.
शहराच्या विकासात मोलाचे योगदान देणाऱ्या नेतृत्वाच्या कार्याची कायम स्मृती राहावी आणि नव्या पिढीला प्रेरणा मिळावी, या उद्देशाने हा उपक्रम राबविण्यात येणार असल्याचे भाऊसाहेब भोईर यांनी सांगितले.
