पिंपरी-चिंचवड | प्रतिनिधी :
पिंपरी-चिंचवड महानगरपालिकेच्या सार्वत्रिक निवडणुकीच्या पार्श्वभूमीवर प्रभाग क्रमांक २८ पिंपळे सौदागर येथे प्रचाराने जोर धरला असून, भाजपच्या उमेदवारांनी कोपरा सभांच्या माध्यमातून थेट मतदारांशी संवाद साधत विकासाचा स्पष्ट अजेंडा मांडला. या सभांमध्ये भाजप नेते व उमेदवार शत्रुघ्न काटे यांनी आक्रमक शब्दांत मतदारांना साद घालत, “पिंपळे सौदागर हा नंबर वन आहे आणि नंबर वनच राहणार—हा माझा शब्द आहे,” अशी ठाम ग्वाही दिली.
कोपरा सभांदरम्यान नागरिकांशी संवाद साधताना शत्रुघ्न काटे म्हणाले की, पिंपळे सौदागरचा नियोजनबद्ध विकास, दर्जेदार पायाभूत सुविधा, स्वच्छता, सुदृढ वाहतूक व्यवस्था आणि नागरिकाभिमुख प्रशासन हीच या परिसराची ओळख आहे. पुढील कार्यकाळात रस्ते, ड्रेनेज, पाणीपुरवठा, उद्याने, आरोग्य व शिक्षण सुविधा अधिक सक्षम करून परिसराचा सर्वांगीण कायापालट केला जाईल, असा विश्वास त्यांनी व्यक्त केला.
यावेळी प्रभाग २८ मधील उमेदवार डॉ. कुंदा भिसे, अनिता संदीप काटे आणि संदेश काटे यांनीही आपली भूमिका मांडत नागरिकांच्या समस्या थेट ऐकून घेतल्या. स्थानिक प्रश्नांवर तत्काळ उपाययोजना, पारदर्शक कारभार आणि सतत लोकांमध्ये राहणारे प्रतिनिधित्व देण्याचे आश्वासन देण्यात आले. “कोपरा सभा म्हणजे केवळ प्रचार नव्हे, तर लोकांच्या अपेक्षा समजून घेण्याचा थेट संवाद आहे,” असे मत उमेदवारांनी व्यक्त केले.
या सभांना नागरिकांचा उत्स्फूर्त प्रतिसाद लाभला. आतापर्यंत झालेल्या विकासकामांचा आढावा, आगामी नियोजन आणि प्रभाग २८ ला ‘मॉडेल वॉर्ड’ बनवण्याचा संकल्प ऐकून मतदारांमध्ये सकारात्मक वातावरण निर्माण झाले. आगामी निवडणुकीत प्रभाग २८ मध्ये विकास हाच केंद्रबिंदू ठरणार असल्याचे चित्र या कोपरा सभांमधून स्पष्ट होत आहे.
