“आमदार महेश लांडगे यांची माहिती; मुख्यमंत्री स्तरावर सकारात्मक निर्णय”
पिंपरी-चिंचवड | प्रतिनिधी :
चिखली येथील घरकुल प्रकल्पात वास्तव्यास असलेल्या सुमारे ६,७०० कुटुंबांना लवकरच मालमत्ता करातून सूट मिळणार असल्याचा दिलासादायक निर्णय अपेक्षित असून, या संदर्भात मुख्यमंत्री देवेंद्र फडणवीस यांनी सकारात्मक भूमिका घेतली आहे, अशी माहिती आमदार महेश लांडगे यांनी दिली.
भाजपचे अधिकृत उमेदवार निलेश नेवाळे, कुंदन गायकवाड, योगिता नागरगोजे आणि रिटा सानप यांच्या प्रचारासाठी चिखली घरकुल परिसरात आयोजित सभेत ते बोलत होते.
आमदार लांडगे यांनी सांगितले की, घरकुलधारकांवर लादण्यात आलेला मालमत्ता कर हा अन्यायकारक असून, या प्रश्नाबाबत हिवाळी अधिवेशनात शासनाकडे ठामपणे पाठपुरावा करण्यात आला. सातत्यपूर्ण प्रयत्नांना यश येत असून, या निर्णयामुळे हजारो कुटुंबांचा आर्थिक भार हलका होणार आहे.
ते पुढे म्हणाले की, पूर्वीच्या काळात घरकुल योजना राबवताना अनेक तांत्रिक व प्रशासकीय त्रुटी राहिल्या. त्या चुका दुरुस्त करून नागरिकांना न्याय देण्याचे काम सध्याचे सरकार करत आहे. शास्ती कर रद्द करणे, घरकुल इमारतींना ब्लॉक बसवणे, सौर ऊर्जा प्रकल्प राबवणे अशा उपक्रमांमुळे रहिवाशांच्या जीवनमानात सुधारणा होत असल्याचे त्यांनी स्पष्ट केले.
“भाजपचे राजकारण हे केवळ घोषणांचे नसून प्रत्यक्ष कामावर आधारित आहे. टीकेला उत्तर देण्याऐवजी आम्ही विकासातून उत्तर देतो. मात्र, आमच्या संयमाचा गैरफायदा घेण्याचा प्रयत्न झाला, तर त्याला ठोस उत्तर दिले जाईल,” असे ठाम मतही आमदार लांडगे यांनी व्यक्त केले.
प्रभागाचा समतोल व सर्वांगीण विकास साधायचा असेल, तर नागरिकांनी भाजपच्या उमेदवारांना भरभरून पाठिंबा द्यावा, असे आवाहनही त्यांनी यावेळी केले.
