पिंपरी-चिंचवड | दि. २१ डिसेंबर २०२५ :
महापालिका सार्वत्रिक निवडणूक २०२६ च्या पार्श्वभूमीवर पिंपरी-चिंचवड शहरातील राजकीय हालचालींना वेग आला असून राष्ट्रवादी काँग्रेस पार्टीने शहरातील सर्वात पहिला पॅनल जाहीर करून प्रचाराची अधिकृत सुरुवात केली आहे. प्रभाग क्रमांक २८ पिंपळे सौदागर-रहाटणी येथे प्रचार प्रमुख तथा माजी विरोधी पक्षनेते श्री. विठ्ठल उर्फ नाना काटे यांच्या नेतृत्वाखाली नारळ फोडून प्रचाराचा शुभारंभ करण्यात आला.
या पॅनलमध्ये सर्वसाधारण पुरुष उमेदवार म्हणून श्री. विठ्ठल उर्फ नाना काटे, सर्वसाधारण ओबीसी प्रवर्गातून सौ. मिनाक्षी अनिल काटे, तसेच सर्वसाधारण महिला उमेदवार म्हणून सौ. शीतलताई नाना काटे आणि सौ. सायली उमेश काटे यांचा समावेश आहे. पिंपरी-चिंचवड शहरात प्रथमच एका प्रभागात तीन महिला आणि एक पुरुष उमेदवारांचा पॅनल उभा राहत असल्याने हा निर्णय राजकीयदृष्ट्या महत्त्वाचा मानला जात आहे.
प्रचाराच्या प्रारंभी अखंड हिंदुस्तानचे आराध्य दैवत छत्रपती श्री शिवाजी महाराज यांच्या पुतळ्यास पुष्पहार अर्पण करण्यात आला. त्यानंतर पिंपळे सौदागरचे ग्रामदैवत श्री. मुजोबां महाराज मंदिरात श्रीफळ वाढवून प्रचाराची विधिवत सुरुवात करण्यात आली. धार्मिक आणि सांस्कृतिक परंपरेला साक्ष ठेवत केलेल्या या प्रारंभामुळे परिसरात सकारात्मक वातावरण निर्माण झाले.
यानंतर पिंपळे सौदागर गावठाण परिसरातून भव्य पदयात्रा आणि प्रचारफेरी काढण्यात आली. या फेरीत ग्रामस्थ, महिला, युवक, ज्येष्ठ नागरिक मोठ्या संख्येने सहभागी झाले होते. प्रचारफेरीदरम्यान पॅनलमधील उमेदवारांचे नागरिकांच्या वतीने ठिकठिकाणी औक्षण करून स्वागत करण्यात आले. नागरिकांनी दिलेल्या उस्फूर्त प्रतिसादामुळे संपूर्ण परिसरात उत्साहाचे वातावरण पाहायला मिळाले.
यावेळी उपस्थितांना संबोधित करताना प्रचार प्रमुख श्री. विठ्ठल उर्फ नाना काटे म्हणाले की, “शहरातील बहुतांश प्रभागांमध्ये ५० टक्के आरक्षणानुसार दोन महिला व दोन पुरुष उमेदवार आहेत. मात्र पिंपळे सौदागर-रहाटणी हा पिंपरी-चिंचवड शहरातील एकमेव प्रभाग आहे, जिथे तीन महिला आणि एक पुरुष असा पॅनल उभा आहे. महिलांना नेतृत्वाची संधी देणारा हा निर्णय प्रगत विचारसरणीचे प्रतीक आहे.”
पुढे बोलताना त्यांनी मतदारांना आवाहन केले की, “हा राष्ट्रवादी काँग्रेसचा पॅनल संपूर्ण शहरात सर्वाधिक मताधिक्याने निवडून द्या, जेणेकरून प्रभागाचा सर्वांगीण विकास, मूलभूत सुविधा, महिला सक्षमीकरण आणि नागरिकांच्या प्रश्नांना प्राधान्य देता येईल.” त्यांच्या या आवाहनाला उपस्थित नागरिकांनी टाळ्यांच्या गजरात प्रतिसाद दिला.
या प्रचार शुभारंभ कार्यक्रमामुळे पिंपरी-चिंचवड महापालिका निवडणूक २०२६ मध्ये राष्ट्रवादी काँग्रेसने आघाडी घेतल्याचे चित्र स्पष्ट झाले असून आगामी काळात प्रचार अधिक तीव्र होण्याची चिन्हे आहेत.
