उद्योग सुलभतेसाठी ‘उद्योग सुविधा कक्ष’ – पिंपरी चिंचवड महापालिकेचा महत्त्वपूर्ण पुढाकार
‘उद्योग सारथी’ पोर्टलच्या माध्यमातून एकवाट संवाद, जलद सेवा आणि पारदर्शक यंत्रणा – उद्योजकांमध्ये समाधानाची भावना
पिंपरी | ७ एप्रिल २०२५ – औद्योगिक नगरी म्हणून ओळखल्या जाणाऱ्या पिंपरी चिंचवड शहरात आता उद्योग क्षेत्रातील अडचणी सोडवण्यासाठी आणि गुंतवणुकीला चालना देण्यासाठी ‘उद्योग सुविधा कक्ष’ स्थापन करण्यात आला आहे. पिंपरी चिंचवड महापालिकेच्या या उपक्रमामुळे शहरातील उद्योजक, व्यापारी व गुंतवणूकदार यांच्यात समाधानाची लाट उसळली असून, ‘Ease of Doing Business’ चा आदर्श मॉडेल उभा राहण्याची शक्यता आहे.
महापालिकेच्या मुख्य प्रशासकीय इमारतीत आयोजित विशेष बैठकीत या उपक्रमाचे सादरीकरण करण्यात आले. यावेळी अतिरिक्त आयुक्त विजयकुमार खोराटे यांनी ‘उद्योग सारथी’ या डिजिटल पोर्टलची माहिती दिली. त्यांनी स्पष्ट केले की, “राज्य शासनाच्या ‘१०० दिवसांचा कृती आराखडा’ अंतर्गत सुरू करण्यात आलेल्या गुंतवणूक प्रसार कृती कार्यक्रमाचा भाग म्हणून हा कक्ष स्थापन केला आहे. यामध्ये कायदेशीर सल्ला, प्रशासकीय मंजुरी, परवाने तसेच CSR आणि सामाजिक कल्याणाच्या योजना डिजिटल स्वरूपात एका क्लिकवर उपलब्ध असतील.”
या बैठकीला अतिरिक्त आयुक्त तृप्ती सांडभोर, मुख्य माहिती व तंत्रज्ञान अधिकारी निळकंठ पोमण, CSR सल्लागार श्रुतिका मुंगी, उद्योग कक्षाचे संचालक विजय वावरे, माहिती अधिकारी दीपक पवार, क्षेत्रीय अधिकारी अजिंक्य येळे आदी मान्यवर उपस्थित होते. इंडस्ट्री असोसिएशनचे अध्यक्ष अभय भोर यांनी महापालिकेच्या या पुढाकाराचे स्वागत करत “हे पाऊल उद्योगासाठी मैलाचा दगड ठरेल,” असे मत व्यक्त केले.
‘उद्योग सारथी’ – उद्योगांसाठी एकवाट डिजिटल समाधान
‘उद्योग सारथी’ हे पोर्टल उद्योजकांसाठी अत्यंत सोयीचे असून, विविध शासकीय परवाने, मंजुरी प्रक्रिया, माहिती सेवा, आणि CSR प्रकल्पांशी संबंधित उपक्रम सहज आणि पारदर्शकपणे हाताळता येणार आहेत. पोर्टलच्या माध्यमातून थेट संवाद साधण्याची सोय असल्यामुळे समस्यांचे निराकरण वेगाने करता येईल, असा विश्वास महापालिकेने व्यक्त केला आहे.
उद्योग सुविधा कक्षाच्या माध्यमातून दरमहा स्थानिक प्रश्नांवर मासिक बैठकांचे आयोजन, तसेच त्रैमासिक आयुक्तस्तरीय धोरणात्मक चर्चा आणि CSR, आरोग्य, शिक्षण यासारख्या क्षेत्रातील उपक्रमांची माहिती दिली जाणार आहे. त्यामुळे प्रशासन आणि उद्योग यामधील दरी कमी होऊन, सशक्त भागीदारी तयार होईल.
सहभागासाठी नोंदणीचे आवाहन
उद्योग सुविधा कक्षाचे संचालक विजय वावरे यांनी शहरातील सर्व लघु, मध्यम आणि मोठ्या उद्योग प्रतिनिधींना ‘उद्योग सारथी’ पोर्टलवर नोंदणी करण्याचे आवाहन केले. त्यांनी सांगितले की, “पुढील टप्प्यात उद्योग संघटनांसोबत नियमित सल्लामसलत बैठकांचे आयोजन करून त्यांच्या सूचना आणि अडचणींचा विचार केला जाईल.”
पारदर्शकतेकडे वाटचाल – महापालिकेचा अभिनव प्रयोग
ही संकल्पना पिंपरी चिंचवड महापालिकेच्या प्रशासनातील नवविचार आणि नवतंत्रज्ञानाचा एक उत्कृष्ट नमुना ठरत आहे. या उपक्रमामुळे उद्योजकांचा वेळ, पैसा आणि श्रम वाचून त्यांना त्यांच्या व्यवसायावर लक्ष केंद्रीत करता येईल. ‘उद्योग सुविधा कक्ष’ आणि ‘उद्योग सारथी’ पोर्टलचे सुसंगत आणि तांत्रिकदृष्ट्या सक्षम अंमलबजावणीमुळे पिंपरी चिंचवड हे शहर महाराष्ट्रातील ‘बिझनेस हब’ म्हणून पुढे येण्याची शक्यता अधिक बळकट झाली आहे.
