Golden Hour Treatment म्हणजे काय?
गंभीर रुग्णांवर आर्थिक स्थितीकडे न पाहता उपचार आवश्यक
नियम भंग केल्यास कायदेशीर कारवाईची तरतूद
पिंपरी, १० एप्रिल २०२५:
पिंपरी चिंचवड महानगरपालिका क्षेत्रातील सर्व खाजगी रुग्णालयांनी दि बॉम्बे नर्सिंग होम ऍक्ट, १९४९ व महाराष्ट्र शासन अधिसुचना दिनांक १४ जानेवारी २०२१ मधील तरतुदींचे काटेकोर पालन करावे, असा स्पष्ट इशारा महापालिकेच्या आरोग्य विभागाकडून देण्यात आला आहे.
महानगरपालिकेने दिनांक ९ एप्रिल २०२५ रोजी सर्व खाजगी नर्सिंग होम्स, हॉस्पिटल्स यांना एक परिपत्रक निर्गमित करत खालील महत्त्वाच्या नियमांचे पालन अनिवार्य असल्याचे कळविले आहे. या अधिसुचनेनुसार प्रत्येक हॉस्पिटलने सौजन्यपूर्ण वागणूक राखावी व प्रत्येक रुग्णाला सन्मानाने सेवा द्यावी, असे स्पष्टपणे नमूद आहे.
“Golden Hour Treatment” अनिवार्य
आपत्कालीन वैद्यकीय सेवांसाठी महत्त्वपूर्ण असलेल्या ‘Golden Hour Treatment’ म्हणजेच अपघात, हृदयविकार, ब्रेन स्ट्रोक यांसारख्या आपत्कालीन स्थितींमध्ये पहिल्या एक तासातील तातडीचा उपचार, याचे महत्त्व अधोरेखित करण्यात आले आहे. महाराष्ट्र शासनाच्या अधिसुचना नियम ११(जे) नुसार, कोणत्याही रुग्णाच्या आर्थिक स्थितीचा विचार न करता गंभीर रुग्णांना त्वरित जीवनरक्षण सेवा द्यावी लागेल. यानंतर गरज असल्यास नजीकच्या उच्च सुविधा असलेल्या रुग्णालयात योग्य रीतीने संदर्भित करणे आवश्यक आहे.
आपत्कालीन सेवा सुविधा अनिवार्य
प्रत्येक खाजगी रुग्णालयाने आपल्याकडे आपत्कालीन परिस्थितीसाठी आवश्यक साधनसामुग्री, प्रशिक्षित वैद्यकीय व परावैद्यकीय कर्मचारी ठेवणे बंधनकारक आहे. गंभीर परिस्थितीत रुग्णांचे प्राण वाचवण्यासाठी ही संसाधने तत्काळ उपलब्ध असावीत, अशी अपेक्षा शासनाने व्यक्त केली आहे.
महापालिकेचा कडक संदेश
महापालिकेचे आरोग्य विभागप्रमुख डॉ. लक्ष्मण गोफणे यांनी सांगितले की, “कोणत्याही खाजगी रुग्णालयाने जीवनरक्षण उपचारांमध्ये दिरंगाई केल्यास कायदेशीर कारवाई केली जाईल. रुग्णाचा जीव वाचवणे ही सर्वोच्च प्राथमिकता असली पाहिजे.”
या आदेशाच्या पार्श्वभूमीवर रुग्णहिताची जाणीव ठेवत खाजगी हॉस्पिटल्सने आपत्कालीन सेवा अधिक सक्षम करण्याची गरज अधोरेखित झाली आहे. Golden Hour मध्ये योग्य उपचार मिळाल्यास हजारो जीव वाचू शकतात, याची जाणीव प्रत्येक हॉस्पिटल प्रशासनाने ठेवली पाहिजे.
नागरिकांचीही भूमिका महत्त्वाची
रुग्ण व त्यांच्या नातेवाईकांनीही आपत्कालीन परिस्थितीत हॉस्पिटलकडे त्वरित मदतीची अपेक्षा बाळगणे स्वाभाविक आहे. मात्र, नागरिकांनी देखील या नियमांची माहिती ठेवून आवश्यक वेळी योग्य निर्णय घेणे गरजेचे आहे.
