पिंपरी-चिंचवड महापालिका निवडणूक २०२५ : प्रभाग १, ११, १२, १३ साठी उमेदवारांची मार्गदर्शन बैठक; उद्या घरकुल टाउन हॉल येथे आयोजन

पिंपरी, दि. २१ डिसेंबर २०२५ :

पिंपरी चिंचवड महानगरपालिका सार्वत्रिक निवडणूक-२०२५ च्या पार्श्वभूमीवर प्रभाग क्रमांक १, ११, १२ आणि १३ मधील राजकीय हालचालींना वेग आला आहे. निवडणूक प्रक्रियेत पारदर्शकता, आचारसंहिता आणि कायदेशीर बाबींबाबत सुस्पष्ट मार्गदर्शन मिळावे, यासाठी मा. निवडणूक निर्णय अधिकारी यांच्या मार्गदर्शनाखाली महत्त्वपूर्ण बैठक आयोजित करण्यात आली आहे.

फ क्षेत्रीय कार्यालयांतर्गत येणाऱ्या या प्रभागांतील राजकीय पक्षांचे उमेदवार, इच्छुक उमेदवार तसेच अधिकृत निवडणूक प्रतिनिधी यांच्यासाठी ही बैठक अत्यंत महत्त्वाची मानली जात आहे. या बैठकीत पिंपरी चिंचवड महापालिका निवडणूक २०२५ संदर्भातील विविध नियम, खर्च मर्यादा, प्रचार पद्धती, आचारसंहिता, तसेच निवडणूक प्रक्रियेशी संबंधित आवश्यक बाबींवर सविस्तर मार्गदर्शन केले जाणार आहे.
सहाय्यक निवडणूक अधिकारी तथा क्षेत्रीय अधिकारी अतुल पाटील यांनी दिलेल्या माहितीनुसार,

👉 सोमवार, दि. २२ डिसेंबर २०२५ रोजी दुपारी ३.०० वाजता
👉 मा. निवडणूक निर्णय अधिकारी यांचे कार्यालय, घरकुल टाउन हॉल, चिखली

येथे ही मार्गदर्शन बैठक पार पडणार आहे.
निवडणूक प्रक्रियेत कोणतीही अडचण येऊ नये, तसेच उमेदवारांना नियमांची अचूक माहिती मिळावी, या उद्देशाने ही बैठक आयोजित करण्यात आली आहे. त्यामुळे प्रभाग १, ११, १२ व १३ मधील सर्व संबंधितांनी या बैठकीस उपस्थित राहावे, असे आवाहन प्रशासनाकडून करण्यात आले आहे.

दरम्यान, पिंपरी चिंचवड महापालिका निवडणूक २०२५ च्या पार्श्वभूमीवर शहरातील राजकीय वातावरण चांगलेच तापले असून, अशा मार्गदर्शन बैठकींमुळे निवडणूक प्रक्रिया अधिक शिस्तबद्ध आणि पारदर्शक होण्यास मदत होणार आहे.