पिंपरी, दि. ७ मार्च : पिंपरी चिंचवड महानगरपालिका शिक्षण विभाग आणि इएल माईंडस्पार्क यांच्या संयुक्त विद्यमाने EdTech (शैक्षणिक तंत्रज्ञान) तसेच PAL – Personalised Adaptive Learning (वैयक्तिक अनुकूल शिक्षण पद्धती) या विषयावर विशेष मार्गदर्शन सत्राचे आयोजन चिंचवड येथील ऑटो क्लस्टर सभागृहात करण्यात आले.
महापौर रवि लांडगे यांच्या निर्देशानुसार तसेच शिक्षण समिती सभापती रविना अंगोळकर आणि उप आयुक्त ममता शिंदे यांच्या मार्गदर्शनाखाली ही कार्यशाळा आयोजित करण्यात आली. या कार्यक्रमाला प्राथमिक शिक्षण विभागाच्या प्रशासन अधिकारी संगीता बांगर, समन्वय अधिकारी सुनिता गीते तसेच महापालिका शाळांचे मुख्याध्यापक आणि शिक्षक उपस्थित होते.
या प्रसंगी इएल माईंडस्पार्कतर्फे प्रकल्प व्यवस्थापक नमन कुमार आणि सहाय्यक प्रशिक्षण व्यवस्थापक रीता दाक्षिणी यांनी उपस्थितांना सविस्तर मार्गदर्शन केले. त्यांनी MindSpark या PAL – Personalised Adaptive Learning सॉफ्टवेअरची माहिती देताना ही प्रणाली कृत्रिम बुद्धिमत्ता (Artificial Intelligence – AI) आधारित डिजिटल शिक्षण प्रणाली असल्याचे सांगितले.
ही प्रणाली विद्यार्थ्यांच्या शिकण्याच्या पातळीचा अभ्यास करून त्यानुसार वैयक्तिक मार्गदर्शन देते. विद्यार्थ्यांच्या कमकुवत बाबी ओळखून त्यानुसार प्रश्न, सराव व शैक्षणिक उपक्रम उपलब्ध करून देण्यात येतात. त्यामुळे विशेषतः गणित आणि इंग्रजी विषयातील संकल्पना अधिक स्पष्ट होण्यास मदत होते आणि विद्यार्थ्यांच्या शैक्षणिक प्रगतीला गती मिळते.
या मार्गदर्शन सत्रामध्ये विद्यार्थ्यांमध्ये कृत्रिम बुद्धिमत्ता (AI) तसेच Computational Thinking (संगणकीय विचारप्रक्रिया) या संकल्पनांबाबत जागरूकता निर्माण करण्यावरही विशेष भर देण्यात आला.
कार्यक्रमाला पिंपरी चिंचवड महानगरपालिकेच्या सुमारे २० शाळांमधून प्रत्येकी दोन प्रतिनिधी सहभागी झाले होते. याशिवाय सुमारे ४० मुख्याध्यापक आणि शिक्षक या सत्रात उपस्थित होते.
डिजिटल शिक्षणाच्या माध्यमातून विद्यार्थ्यांना गुणवत्तापूर्ण शिक्षण उपलब्ध करून देण्यासाठी अशा उपक्रमांचा निश्चितच सकारात्मक फायदा होईल, असा विश्वास यावेळी व्यक्त करण्यात आला.
“आजच्या डिजिटल युगात विद्यार्थ्यांना आधुनिक तंत्रज्ञानाची ओळख करून देणे अत्यंत आवश्यक आहे. माईंडस्पार्क सारख्या कृत्रिम बुद्धिमत्ता आधारित शिक्षण प्रणालीमुळे विद्यार्थ्यांच्या शिकण्याच्या पातळीनुसार वैयक्तिक मार्गदर्शन मिळते. त्यामुळे गणित व इंग्रजी विषयातील संकल्पना अधिक प्रभावीपणे समजण्यास मदत होते. महापालिकेच्या शाळांमध्ये अशा तंत्रज्ञानाधारित उपक्रमांची अंमलबजावणी केल्यास विद्यार्थ्यांना गुणवत्तापूर्ण आणि आधुनिक शिक्षण मिळण्यास निश्चितच मदत होईल.”— रवि लांडगे, महापौर, पिंपरी चिंचवड महानगरपालिका
“महापालिकेच्या शाळांमधील विद्यार्थ्यांना आधुनिक आणि गुणवत्तापूर्ण शिक्षण मिळावे यासाठी डिजिटल शिक्षण पद्धतीचा वापर करणे काळाची गरज आहे. PAL प्रणालीमुळे विद्यार्थ्यांच्या शिकण्याच्या क्षमतेनुसार त्यांना मार्गदर्शन मिळते. त्यामुळे गणित व इंग्रजी विषयातील संकल्पना अधिक स्पष्ट होऊन विद्यार्थ्यांची शैक्षणिक गुणवत्ता वाढण्यास मदत होईल.”
— रविना अंगोळकर, शिक्षण समिती सभापती, पिंपरी चिंचवड महानगरपालिका
