पिंपरी, दि. १३ मार्च २०२६ : पिंपरी-चिंचवड महानगरपालिकेच्या क्रीडा, कला, सांस्कृतिक व साहित्य समितीचे कामकाज अधिक नियोजनबद्ध आणि प्रभावी करण्यासाठी समितीच्या सर्व उपक्रमांसाठी एक सर्वसमावेशक धोरण तयार करण्यात येणार आहे. समितीच्या वर्षभरातील कार्यक्रमांचे आगाऊ नियोजन करून सर्व सदस्यांच्या सहमतीने हे धोरण निश्चित केले जाईल, अशी माहिती समितीचे सभापती कैलास कुटे यांनी दिली.
महापालिकेच्या मुख्य प्रशासकीय इमारतीतील दिवंगत माजी महापौर मधुकरराव पवळे सभागृह येथे झालेल्या समितीच्या बैठकीत शहरातील क्रीडा, सांस्कृतिक आणि साहित्यिक उपक्रम अधिक प्रभावीपणे राबविण्याबाबत सविस्तर चर्चा करण्यात आली. शहरातील खेळाडूंना आवश्यक सुविधा उपलब्ध करून देणे आणि समितीचे कामकाज अधिक सुबक पद्धतीने राबविणे यावर बैठकीत एकमत व्यक्त करण्यात आले.
बैठकीस महापालिकेचे विरोधी पक्षनेते तथा समिती सदस्य भाऊसाहेब भोईर, सदस्य जितेंद्र ननावरे, शाम जगताप, तानाजी बारणे, धर्मपाल तंतरपाळे, उदय गायकवाड, योगेश लांडगे, प्रमोद कुटे यांच्यासह नगरसचिव मुकेश कोळप, उपआयुक्त पंकज पाटील, चेतना केरूरे, विशेष अधिकारी किरण गायकवाड, जनता संपर्क अधिकारी प्रफुल्ल पुराणिक आणि महापालिका कर्मचारी उपस्थित होते.
बैठकीत शहरातील महापालिकेच्या जलतरण तलावांमधील पाण्याची गुणवत्ता राखण्यासाठी क्लोरीनची पातळी नियमित तपासण्याच्या सूचना देण्यात आल्या. नागरिकांना याची माहिती मिळावी यासाठी तलाव परिसरात सूचनाफलक लावण्याचे निर्देशही देण्यात आले.
तसेच क्रीडा विभागाच्या सध्याच्या धोरणाचा सविस्तर अहवाल समितीसमोर सादर करण्याचे निर्देश देण्यात आले. या अहवालाचा अभ्यास करून आवश्यक ते बदल समिती सदस्यांच्या संमतीने करण्यात येणार आहेत. समितीच्या वर्षभराच्या कामकाजाचे आगाऊ नियोजन तयार करून त्यावर ठराव मंजूर करण्यावरही भर देण्यात आला.
शहरातील सांस्कृतिक क्षेत्राला चालना देण्यासाठी महापालिकेच्या नाट्यगृहांमध्ये स्थानिक कलाकारांना प्राधान्य देण्याचा निर्णय घेण्यात आला. नाट्यगृहांमध्ये इतर शहरांतील कलाकारांच्या छायाचित्रांऐवजी पिंपरी-चिंचवडमधील स्थानिक कलाकार व सांस्कृतिक क्षेत्रात उल्लेखनीय कामगिरी करणाऱ्या व्यक्तींची छायाचित्रे लावण्याची सूचना करण्यात आली.
याशिवाय शहरात राष्ट्रीय आणि राज्यस्तरीय क्रीडा स्पर्धांसाठी येणाऱ्या खेळाडूंसाठी स्वतंत्र वसतीगृह उभारण्याचा प्रस्ताव मांडण्यात आला. तसेच पिंपरी-चिंचवड शहरात आंतरराष्ट्रीय दर्जाचे क्रिकेट स्टेडियम उभारण्यासाठी प्रयत्न करण्याची गरजही बैठकीत व्यक्त करण्यात आली.
नेहरूनगर येथील आण्णासाहेब मगर स्टेडियमच्या प्रलंबित कामांना गती देण्यावरही विशेष भर देण्यात आला. शहरातील मुलांना खेळासाठी अधिक संधी उपलब्ध व्हाव्यात यासाठी महापालिकेच्या शाळांमधील मैदाने सुट्टीच्या दिवशी खेळण्यासाठी खुली करण्याबाबत सकारात्मक निर्णय घेण्याची सूचनाही करण्यात आली.
१ मे रोजी साजऱ्या होणाऱ्या कामगार दिनानिमित्त शहरातील विविध ठिकाणी क्रीडा व सांस्कृतिक कार्यक्रमांचे आयोजन करण्याचा निर्णयही बैठकीत घेण्यात आला. यामुळे कामगारांच्या योगदानाचा सन्मान होईल आणि शहरात सामाजिक व सांस्कृतिक वातावरणाला चालना मिळेल, असे मत व्यक्त करण्यात आले.
दरम्यान, शहरातील खेळाडूंना दर्जेदार प्रशिक्षण मिळावे यासाठी प्रशिक्षकांची संख्या वाढविण्याबाबत संबंधित विभागाला सूचना देण्यात आल्या. खेळाडूंना दुखापती झाल्यास उपचार खर्चाचा भार कमी व्हावा यासाठी विशेष विमा योजना सुरू करण्याबाबतही बैठकीत चर्चा झाली. तसेच विविध क्रीडा संकुल आणि मैदानांवर सुरक्षारक्षकांची संख्या वाढविण्याच्या सूचनाही देण्यात आल्या.
बैठकीत यमुनानगर येथील माँसाहेब सौ. मिनाताई ठाकरे जलतरण तलाव आणि मोहननगर येथील श्री छत्रपती राजश्री शाहू महाराज जलतरण तलाव तीन वर्षांसाठी भाडे तत्वावर चालविण्यास देण्याबाबतचा ठराव स्थायी समितीसमोर सादर करण्यास मंजुरी देण्यात आली.
