📍कामगार नेते मा.केशव घोळवे यांना भारतीय जनता पक्षाने विधान परिषदेची उमेदवारी देऊन संधी द्यावी — कामगार वर्गाची मागणी

पिंपरी-चिंचवड : औद्योगिक क्षेत्रातून घडलेले आणि कामगारांच्या हक्कांसाठी सातत्याने लढणारे ज्येष्ठ कामगार नेते केशव घोळवे यांना येणाऱ्या विधान परिषद निवडणुकीत भारतीय जनता पक्षाने उमेदवारी द्यावी, अशी जोरदार मागणी कामगार वर्गातून पुढे येत आहे. संघटनात्मक काम, सामाजिक बांधिलकी आणि प्रशासनिक अनुभव यांचा संगम असलेले नेतृत्व म्हणून घोळवे यांच्याकडे पाहिले जात आहे.

अत्यंत प्रतिकूल परिस्थितीतून पुढे आलेल्या केशव घोळवे यांनी उसतोड मजूर कुटुंबातून आपला प्रवास सुरू केला. शिक्षणासाठी लहानपणी विविध कष्टाची कामे करत त्यांनी आयटीआयचे शिक्षण पूर्ण केले आणि वेल्डर म्हणून औद्योगिक क्षेत्रात प्रवेश केला. अनेक वर्षांच्या संघर्षानंतर १९९८ मध्ये थरमॅक्समध्ये कायम नोकरी मिळाल्यानंतर त्यांनी कामगार प्रतिनिधी म्हणून आपली वेगळी ओळख निर्माण केली.

थरमॅक्स कामगार संघटनेच्या माध्यमातून त्यांनी औद्योगिक क्षेत्रात अनेक सकारात्मक बदल घडवून आणले. ‘कायझेन’, ‘5S’, ‘TPM’, ‘TQM’ यांसारख्या आधुनिक व्यवस्थापन तत्त्वांचा अवलंब करून ही उत्पादनक्षमता वाढवणे, अपव्यय कमी करणे आणि कामगार-व्यवस्थापन संबंध सुधारण्यावर त्यांनी भर दिला. त्यांच्या नेतृत्वाखाली संघटनेला ISO 9001 प्रमाणपत्र मिळाले, तसेच कामगारांच्या समाधानाचा सर्वेक्षणासारखे उपक्रम राबवले गेले.

२००४ मध्ये ‘श्रमिक एकता महासंघ’ची स्थापना करून त्यांनी लहान-मोठ्या १५० हून अधिक संघटनांना एकत्र आणण्याचे कार्य केले. औद्योगिक क्षेत्रातील त्यांच्या कामामुळे त्यांना राष्ट्रीय आणि आंतरराष्ट्रीय स्तरावरही व्याख्यानांसाठी निमंत्रणे मिळाली. इटली, जर्मनी, फ्रान्स आणि स्पेन येथे अभ्यास दौरे करून त्यांनी जागतिक पातळीवरील औद्योगिक पद्धतींचा अभ्यास केला.

दरम्यान, काही प्रतिकूल घटनांमुळे थरमॅक्समधील नोकरी गमवावी लागली, मात्र या संकटालाही संधीमध्ये रूपांतरित करत त्यांनी पिंपरी-चिंचवड महानगरपालिकेच्या निवडणुकीत भाग घेतला आणि नगरसेवक म्हणून निवडून आले. आर्थिक पाठबळ नसतानाही कामगारांच्या विश्वासाच्या जोरावर मिळवलेला हा विजय ‘श्रमशक्तीचा विजय’ म्हणून ओळखला गेला.

नगरसेवक आणि उपमहापौर म्हणून काम करताना त्यांनी शहराच्या विकासासाठी अनेक महत्त्वाचे प्रकल्प राबवले. दिव्यांगांसाठी सुविधा, कामगारांसाठी किमान वेतन अंमलबजावणी, आशा सेविकांचे मानधन वाढ, शिक्षण सेवकांना लाभ मिळवून देणे अशा विविध सामाजिक प्रश्नांवर त्यांनी ठोस भूमिका घेतली.

भारतीय जनता पक्षात सक्रिय झाल्यानंतरही त्यांनी कामगार आणि असंघटित घटकांच्या प्रश्नांसाठी सातत्याने आवाज उठवला आहे. ग्राहक किंमत निर्देशांक समिती आणि किमान वेतन समितीवर काम करताना त्यांनी कामगारांच्या हिताचे निर्णय पुढे नेण्यास हातभार लावला.

कामगार वर्गाचे म्हणणे आहे की, “केशव घोळवे यांच्यासारखे प्रत्यक्ष तळागाळातून आलेले आणि कामगारांच्या समस्यांची सखोल जाण असलेले नेतृत्व विधान परिषदेत गेले, तर कामगारांचे प्रश्न अधिक प्रभावीपणे मांडले जातील.” त्यामुळे येणाऱ्या विधान परिषद निवडणुकीत भारतीय जनता पक्षाने त्यांना उमेदवारी देऊन संधी द्यावी, अशी मागणी जोर धरत आहे.

कामगार चळवळीतील त्यांच्या दीर्घ अनुभवामुळे आणि समाजाभिमुख कार्यामुळे केशव घोळवे यांचे नाव सध्या राजकीय वर्तुळात चर्चेत आले असून, पक्ष नेतृत्व याबाबत काय निर्णय घेते याकडे सर्वांचे लक्ष लागले आहे.