पिंपरी-चिंचवड | प्रतिनिधी
पिंपरी-चिंचवड महानगरपालिका निवडणूक 2025-26 च्या पार्श्वभूमीवर भोसरी विधानसभा भाजपा संघटना वेगाने सक्रिय झाली असून, पक्षाने ‘ऑन फायर मोड’मध्ये व्यापक मोर्चेबांधणी सुरू केली आहे. मतदारसंघातील सर्व प्रभागांमध्ये एकाच वेळी घेतलेल्या बैठकीत इच्छुक उमेदवार, पदाधिकारी आणि कार्यकर्त्यांची हजेरी लक्षणीय होती. विशेष म्हणजे, यावेळी पहिल्यांदाच प्रभाग कमिटी सदस्यांकडून संभाव्य उमेदवारांबाबतचा गोपनीय अभिप्राय घेण्यात आला आहे. त्यामुळे उमेदवारी ठरवताना गटबाजी किंवा बाहेरील दबावापेक्षा तळागाळातील सक्रीय कार्यकर्त्यालाच संधी देण्याचा संदेश ठळकपणे देण्यात आल्याचे दिसते.
भाजपाचे नेते व उच्च व तंत्रशिक्षण मंत्री चंद्रकांत पाटील यांच्या उपस्थितीत झालेल्या कोअर कमिटी बैठकीनंतर भोसरी विधानसभा स्तरावर संघटनात्मक कामाला गती देण्याचे स्पष्ट निर्देश देण्यात आले आहेत. त्यानुसार, मतदारसंघातील 12 प्रभागांमध्ये एकाच दिवसात झालेल्या बैठकीत महत्त्वाचे राजकीय समीकरण, पूर्वीचे मतदान पॅटर्न आणि जनतेच्या अपेक्षा याचा स्वतंत्र आढावा घेण्यात आला.
कार्यकर्त्यांनाच उमेदवारीची संधी?
आमदार महेश लांडगे यांच्या मार्गदर्शनाखाली भोसरी विधानसभा मतदारसंघामध्ये संघटनेची संरचना मजबूत करण्यासाठी विशेष उपक्रम राबवले जात आहेत. प्रभाग कमिटी सदस्यांकडून घेतलेला गोपनीय फॉर्म ही याच प्रक्रियेचा केंद्रबिंदू ठरला आहे. मागील निवडणुकांमध्ये निष्ठेने काम करणाऱ्या कार्यकर्त्यांना प्राधान्य देण्याचा पक्षाचा स्पष्ट कल असल्याची माहिती मिळते.
2014 च्या विधानसभा निवडणुकीत सक्रिय कार्यकर्त्यांना 2017 च्या महापालिका निवडणुकीत संधी देण्यात आली होती. त्यानंतर महापालिका सत्ताकाळातही निष्ठावंत कार्यकर्त्यांना विविध पदांवर नेमणूक देण्यात आली. त्यामुळे आगामी निवडणुकीतही भोसरी विधानसभा भाजपा कार्यकर्त्यांच्या सामर्थ्यावर उमेदवार निश्चित करण्याची तयारी करत आहे.
एकाच जागेसाठी 4-5 इच्छुक, पण संदेश स्पष्ट : ‘कमळ हाच उमेदवार’
एका प्रभागातील उमेदवारीसाठी 4 ते 5 इच्छुक असतानाही, गटात न जाता एकजुटीने काम करण्याचा सल्ला देण्यात आला. उमेदवारीबाबत नाराजी टाळण्यासाठी समन्वयक प्रणाली आणि प्रभागनिहाय निर्णय यंत्रणा अधिक प्रभावीपणे लागू करण्याचे ठरले आहे.
सामाजिक समतोल, स्थानिक मुद्दे, जनआकांक्षा आणि कार्यकर्त्यांची छबी या सर्व घटकांचा स्वतंत्र अभ्यास करून अंतिम पॅनेल निश्चित केले जाणार आहे. हिवाळी अधिवेशनानंतर आमदार लांडगे स्वतः प्रभाग स्तरावर जाऊन कार्यकर्त्यांशी संवाद साधणार आहेत.
आमदार महेश लांडगे यांची प्रतिक्रिया
“प्रत्येक घरापर्यंत भाजपा आणि कमळ चिन्ह पोहोचवण्यासाठी आम्ही संघटनात्मक कार्याला गती दिली आहे. प्रभागनिहाय मजबूत रचना आणि सूक्ष्म मोर्चेबांधणीच्या बळावर 2014, 2019 आणि 2024 मध्ये आम्ही सलग विजय मिळवला. महापालिका निवडणुकीतही हाच फॉर्म्युला प्रभावी ठरणार आहे. हिवाळी अधिवेशनानंतर प्रभाग कमिटी सदस्यांसोबत प्रत्यक्ष चर्चा करून पुढील रणनीती निश्चित केली जाईल.”
– महेश लांडगे, आमदार, भाजपा, पिंपरी-चिंचवड
