चिंचवड, पुणे : नक्षत्राचं देणं काव्यमंच, भोसरी यांच्या वतीने आयोजित 27 वी राज्यस्तरीय श्रावणी काव्यमैफल 2026, श्रावणी काव्यलेखन स्पर्धा पारितोषिक वितरण, विविध पुरस्कार वितरण आणि पुस्तक प्रकाशन सोहळा सायन्स पार्क नाट्यगृह, विज्ञान केंद्र, चिंचवड येथे उत्साहपूर्ण वातावरणात पार पडला.
कार्यक्रमाच्या अध्यक्षस्थानी ज्येष्ठ कवी व विचारवंत प्रा. नरेंद्र पोतदार (गोंदिया) होते, तर उद्घाटन राजेंद्र गवते (पिंपरी) यांच्या हस्ते झाले. प्रमुख पाहुणे म्हणून प्रवीण तुपे, प्रा. महादेव रोकडे, साधनाताई चौधरी, शरदराव ताजणे, श्रीराम एरंडे, ॲड.संजय माने, वैशाली बोरकर तसेच प्रा. राजेंद्र सोनवणे उपस्थित होते.
अध्यक्षीय भाषणात प्रा. नरेंद्र पोतदार यांनी कविता ही संवेदनशील समाजनिर्मितीचे प्रभावी माध्यम असून वाचन, मार्गदर्शन आणि सातत्यपूर्ण लेखनातून कवी घडत असल्याचे सांगितले. तर उद्घाटक राजेंद्र गवते यांनी नक्षत्राचं देणं काव्यमंच गेली 27 वर्षे कवी घडविण्याचे कार्य करत असून पिंपरी-चिंचवडला कवितेची राजधानी बनविण्यात या मंचाचे मोठे योगदान असल्याचे मत व्यक्त केले.
यावेळी ‘बदलती प्रसारमाध्यमे व कायदा’ (लेखक : संजय माने), ‘ओघळणारे अश्रू’ (कथासंग्रह – वैशाली बोरकर) आणि ‘वादळ’ (चारोळीसंग्रह – कवी वादळकार) या पुस्तकांचे प्रकाशन करण्यात आले.
समारंभात समाजभूषण पुरस्कार 2026 संजय नलावडे व दत्तात्रय मुठे, कविरत्न पुरस्कार 2026 सावळेराम रखमाजी डबडे व सुरेशचंद्र चनाल तसेच कुसुमाग्रज स्मृती गौरव पुरस्कार 2026 रामदास अवचर यांना प्रदान करण्यात आला.
27 वी राज्यस्तरीय श्रावणी काव्यलेखन स्पर्धा 2026 मध्ये प्रथम क्रमांक नामदेव पाटील (कोल्हापूर), द्वितीय क्रमांक प्रभा वाघ (चाकण), तृतीय क्रमांक कविता दाते (वर्धा) यांनी पटकावला. तसेच धनाजी खाडे, नीलकृष्ण देशपांडे आणि श्रीपाद टेंबे यांना उत्तेजनार्थ पुरस्कार देण्यात आले.
संपूर्ण महाराष्ट्रातून आलेल्या कवी-कवयित्रींनी ‘श्रावण व निसर्ग’ या विषयावरील कविता सादर करून श्रावणी काव्यमैफल रंगविली. सर्व सहभागी कवींना सन्मानपत्र व गुलाबपुष्प देऊन गौरविण्यात आले.
डॉ. बबन चव्हाण, बालाजी थोरात, संजय पोटे, सुरेशचंद्र चनाल, प्रमोद डोंगरदिवे, सुजित माने, वेदांत बोरकर, शांतीलाल ननवरे, रवी भोजने, तुषार डावखर आणि प्रतिभा कीर्तीकर्वे यांनी कार्यक्रमाच्या यशस्वी आयोजनात मोलाचे योगदान दिले.
सलग पाच तास चाललेल्या या काव्यसोहळ्याची सांगता विश्वगीत पसायदानाने झाली. कार्यक्रमाचे आयोजन प्रा. राजेंद्र दशरथ सोनवणे (कवी वादळकार), संस्थापक-राष्ट्रीय अध्यक्ष, नक्षत्राचं देणं काव्यमंच यांनी केले.
