“रमजानमध्ये मुस्लिमांना लवकर सुट्टी मिळणार? सरकारसमोर मोठी मागणी!”

पवित्र रमजान महिन्यात मुस्लिम बांधवांसाठी लवकर सुट्टीची मागणी –राष्ट्रवादी काँग्रेस पक्ष (शरदचंद्र पवार गट) वरिष्ठ उपाध्यक्ष अ‍ॅड. धम्मराज साळवे यांचे मुख्यमंत्र्यांना निवेदन

पिंपरी-चिंचवड: पवित्र रमजान महिन्याच्या पार्श्वभूमीवर मुस्लिम कर्मचार्‍यांना आणि विद्यार्थ्यांना सांयकाळी लवकर सुट्टी देण्यात यावी, अशी मागणी राष्ट्रवादी काँग्रेस पक्ष (शरदचंद्र पवार गट) पिंपरी-चिंचवड शहराचे वरिष्ठ उपाध्यक्ष अ‍ॅड. धम्मराज साळवे यांनी केली आहे. त्यांनी यासंदर्भात मुख्यमंत्री, उपमुख्यमंत्री आणि नगरविकास मंत्री यांना निवेदन पाठवले आहे.

रमजान महिना 2 मार्च 2025 पासून सुरू होत आहे. या काळात मुस्लिम बांधव रोजा ठेवत असतात आणि सांयकाळी इफ्तारसाठी त्यांना घरी पोहोचणे आवश्यक असते. त्यामुळे महाराष्ट्र शासनाने यासंदर्भात विशेष निर्णय घेऊन मुस्लिम कर्मचारी आणि विद्यार्थ्यांसाठी कामकाजाच्या वेळेत सवलत द्यावी, अशी विनंती अ‍ॅड. साळवे यांनी केली आहे.

धार्मिक सौहार्द जपण्याची मागणी

महाराष्ट्र शासनाने याआधीही विविध धार्मिक सण आणि सांस्कृतिक पार्श्वभूमी लक्षात घेऊन सकारात्मक निर्णय घेतले आहेत. याच धर्तीवर रमजान महिन्यात मुस्लिम बांधवांना सांयकाळी लवकर सुट्टी मिळावी, असा आग्रह अ‍ॅड. साळवे यांनी धरला आहे.

“राज्यातील मुस्लिम कर्मचारी आणि विद्यार्थ्यांना आपल्या धार्मिक परंपरा पाळण्यासाठी सरकारने सहकार्य करावे, ही आमची मागणी आहे. यासाठी सरकारने त्वरित निर्णय घ्यावा,” असे अ‍ॅड. साळवे यांनी स्पष्ट केले.

लोकप्रिय मागणीला जनतेचा मोठा पाठिंबा!

या मागणीला सामान्य नागरिक, सामाजिक कार्यकर्ते आणि मुस्लिम समाजाचा मोठा पाठिंबा मिळत आहे. सरकारने सकारात्मक निर्णय घेतला, तर राज्यात धार्मिक सौहार्द आणि एकात्मता अधिक दृढ होईल, अशी भावना व्यक्त होत आहे.

हा विषय महत्त्वाचा असल्याने शासनाने तातडीने निर्णय घ्यावा, अशी सर्वसामान्यांची अपेक्षा आहे.