पिंपरी, दि. ११ (प्रतिनिधी) – क्रांतिसूर्य महात्मा जोतिराव फुले यांच्या जयंतीनिमित्त आज पिंपरी-चिंचवड शहरात विविध कार्यक्रमांचे आयोजन करण्यात आले. खराळवाडी, पिंपरी येथील राष्ट्रवादी काँग्रेसच्या मध्यवर्ती पक्ष कार्यालयात तसेच पिंपरीतील महात्मा फुले स्मारक येथे शहराध्यक्ष योगेश बहल यांच्या हस्ते फुले यांच्या प्रतिमेला पुष्पहार अर्पण करून अभिवादन करण्यात आले.
यावेळी बोलताना शहराध्यक्ष योगेश बहल म्हणाले की, “आजचा दिवस हा ज्ञान, समानता आणि सामाजिक क्रांतीचा उत्सव आहे. कोणताही धर्म ईश्वराने निर्माण केलेला नसून चातुर्वर्ण्य व जातिभेद ही मानवाचीच निर्मिती आहे. मानवाने एकत्रितपणे, गुण्यागोविंदाने राहावे, हीच महात्मा फुले यांची शिकवण होती.” त्यांनी पुढे सांगितले की, ‘नीती हाच मानवी जीवनाचा आधार आहे’ हा विचार मांडणारे जोतिराव फुले हे महान तत्त्वचिंतक होते.
माजी नगरसेवक ॲड. गोरक्ष लोखंडे यांनीही आपले मनोगत व्यक्त करताना सांगितले की, महात्मा फुले यांनी १८४८ साली पुण्यात मुलींसाठी पहिली शाळा सुरू करून शिक्षणाचा पाया रचला. जातिव्यवस्था, अस्पृश्यता आणि अंधश्रद्धेविरुद्ध त्यांनी आयुष्यभर लढा दिला. त्यांच्या कार्यामुळे समाजात मोठा बदल घडून आला.
या कार्यक्रमाला कार्याध्यक्ष फजल शेख, विजय लोखंडे, नगरसेविका वर्षा जगताप, माजी नगरसेवक सतीश दरेकर, ओबीसी प्रदेश कार्याध्यक्ष सचिन औटे, सामाजिक न्याय विभाग अध्यक्ष संजय औसरमल, महिला वरिष्ठ कार्याध्यक्ष कविता खराडे, शहर उपाध्यक्ष अकबर मुल्ला, शक्रुल्ला पठाण, दत्तात्रय जगताप, अभिजीत आल्हाट, दिलीप पानसरे, उद्योग व्यापार अध्यक्ष श्रीकांत कदम, झोपडपट्टी सेल अध्यक्ष रविंद्र ओव्हाळ, वाहतूक सेल अध्यक्ष विनोद वरखडे, पदवीधर सेल अध्यक्ष प्रदीप आवटी, सरचिटणीस राजेंद्र पवार, पिंपरी विधानसभा कार्याध्यक्ष राजेंद्र कदम, युवक शहर संघटक स्वराज शिंदे, सरचिटणीस राजू चांदणे, गणेश गायकवाड, कुमार कांबळे, सचिन शिंदे, धनाजी तांबे, सुनिल अडागळे आदी पदाधिकारी व कार्यकर्ते उपस्थित होते.
