“शहर काँग्रेस च्या बैठकीत नव्या रणनीती, वरिष्ठांचा रोखठोक संवाद!”

शहर काँग्रेसचा पदाधिकारी मेळावा जल्लोषात पार

तीन ब्लॉकचे पदाधिकारी व कार्यकर्ते एकत्र

निरीक्षक प्रफुल्ल गुडदे पाटील यांची प्रेरणादायी उपस्थिती

संघटना बळकट करण्यासाठी नव्या योजना

कार्यकर्त्यांना देण्यात येणार विशेष जबाबदाऱ्या

जिल्हाध्यक्षांना वाढीव अधिकार

पिंपरी, १२ एप्रिल: प्रांताध्यक्ष हर्षवर्धन सपकाळ यांच्या आदेशानुसार पिंपरी-चिंचवड शहर काँग्रेस कमिटीने संघटना बळकटीसाठी १० एप्रिल रोजी ज्ञानज्योती सावित्रीबाई फुले सभागृहात आढावा बैठक व पदाधिकारी मेळावा आयोजित केला. भोसरी, चिंचवड आणि पिंपरी ब्लॉकच्या कार्याचा आढावा घेण्यासाठी सकाळी ११ ते दुपारी ४ पर्यंत भरगच्च उपस्थितीत कार्यक्रम पार पडला.

कार्यक्रमासाठी निरीक्षक म्हणून आलेले श्री. प्रफुल्ल गुडदे पाटील (सरचिटणीस, अखिल भारतीय काँग्रेस कमिटी) यांनी पदाधिकाऱ्यांशी संवाद साधून संघटनेच्या बांधणीविषयी मार्गदर्शन केले. शहराध्यक्ष डॉ. कैलास कदम यांच्या अध्यक्षतेखाली पार पडलेल्या या मेळाव्यात तीनही ब्लॉक अध्यक्षांनी (विठ्ठल शिंदे – भोसरी, ज्ञानेश्वर मलशेट्टी – चिंचवड, विश्वनाथ जगताप – पिंपरी) आपले अहवाल सादर केले.

पदाधिकाऱ्यांच्या कार्याची माहिती घेतल्यानंतर, गुडदे पाटील यांनी सांगितले की, “पक्ष संघटनाच्या पुनर्बांधणीसाठी राज्यभर निरीक्षक नियुक्त करण्यात आले असून प्रत्येक कार्यकर्त्याचे योगदान महत्त्वाचे आहे. स्थानिक पातळीवर महापालिकेतील विजयासाठी विशेष रणनीती राबवण्यात येणार आहे.”

हे हि वाचावे

आज सकाळपासून GPay, PhonePe बंद! वापरकर्ते सोशल मीडियावर संतप्त – तुमचं अ‍ॅप चालतंय का?

कार्यक्रमात अनेक ज्येष्ठ पदाधिकाऱ्यांना “कृतज्ञता पुरस्कार” देऊन सन्मानित करण्यात आले. यामध्ये तानाजी काटे, भाऊसाहेब मुगुटमल, राजाराम भोंडवे, लक्ष्मण रुपनर आदींचा समावेश होता. यावेळी काँग्रेसमध्ये नवे चेहरेही दाखल झाले. भूपेंद्र तामचिकर, इकबाल खान, हजरत भाई पटेल, रितेश खुडे, महेश भालेराव यांचा पक्षप्रवेश मोठा चर्चेचा विषय ठरला.

गुडदे पाटील यांनी स्पष्ट केले की, “यापुढे जिल्हाध्यक्षांना नियुक्ती, शिफारस व तिकीट वाटपाबाबत अधिकृत अधिकार असणार आहेत. त्यामुळे प्रत्येक पदाधिकाऱ्याने पक्षशिस्त पाळत कार्यरत राहणे गरजेचे आहे.”

या बैठकीत शहरातील काँग्रेस संघटन मजबूत करण्यावर विशेष भर देण्यात आला. यासाठी दरमहा बैठका आयोजित करून त्याचे अहवाल प्रदेश व राष्ट्रीय स्तरावर सादर केले जाणार आहेत. “भविष्यात पक्षासाठी निष्ठावान कार्यकर्त्यांना संधी मिळणार असून, महापालिकेत काँग्रेसचा झेंडा पुन्हा उंचावण्याचा आमचा निर्धार आहे,” असे गुडदे पाटील म्हणाले.

इंडियन नॅशनल काँग्रेस अधिकृत संकेतस्थळ

कार्यक्रमाला शहरातील अनेक नामवंत पदाधिकारी आणि कार्यकर्ते मोठ्या संख्येने उपस्थित होते. संघटनात्मक ऊर्जा, नवचैतन्य आणि आगामी निवडणुकीसाठी काँग्रेसच्या रणनीतीचे हे मेळाव्यातील चित्र स्पष्टपणे उमटले.