भारतातील पहिले ‘संविधान भवन’ पिंपरी-चिंचवडमध्ये; डॉ. बाबासाहेब आंबेडकर यांना समर्पित

संविधान भवन उभारणी पिंपरी चिंचवड

– भारतीय राज्यघटनेच्या प्रचार-प्रसारासाठी महत्त्वपूर्ण पाऊल

आमदार महेश लांडगे यांच्या पुढाकारातून उभारणीस वेग

पिंपरी-चिंचवड | प्रतिनिधी
भारतीय लोकशाहीचे खरे शिल्पकार भारतरत्न डॉ. बाबासाहेब आंबेडकर यांनी देशाला दिलेली राज्यघटना ही केवळ कायदेशीर दस्तऐवज नसून, ती भारतीय नागरिकांच्या हक्कांची गॅरंटी आहे. या अमूल्य ठेव्याचा प्रचार, प्रसार आणि सखोल अभ्यास व्हावा, यासाठी भारतातील पहिले ‘संविधान भवन’ पिंपरी-चिंचवड शहरात उभारले जात आहे. हे भवन संपूर्णपणे डॉ. बाबासाहेब आंबेडकर यांना समर्पित आहे, अशी माहिती भाजपा आमदार महेश लांडगे यांनी दिली.

जनजागृतीसाठी अभिवादन फलक
डॉ. बाबासाहेब आंबेडकर यांच्या जयंतीच्या पार्श्वभूमीवर शहरभर जागोजागी अभिवादन फलक लावण्यात आले आहेत. या फलकांद्वारे संविधानाविषयी जनजागृती करण्याचा उद्देश आहे. पिंपरी-चिंचवडसह परिसरातील नागरिकांमध्ये संविधानाचे महत्त्व पोहोचवण्याचा हा प्रयत्न आहे.

संविधान भवन उभारणीस वेग
आमदार महेश लांडगे यांच्या संकल्पनेतून पेठ क्र. ११, पीएमआरडीए क्षेत्रात या संविधान भवनाचे काम सुरू आहे. आंतरराष्ट्रीय दर्जाची ग्रंथालय सुविधेसह हे भवन उभारले जात आहे. टप्पा १ चे काम सुरू असून, टप्पा २ साठी निविदा प्रक्रिया अंतिम टप्प्यात असल्याचेही त्यांनी सांगितले.

२०१९ पासून हा प्रकल्प पुढे नेण्यासाठी सतत पाठपुरावा करण्यात आला. पीसीएनटीडीएच्या विलिनीकरणानंतर प्रकल्प काही काळ थांबला होता. मात्र २०२२ मध्ये महायुती सरकार आल्यावर कामाला गती मिळाली. मुख्यमंत्री व उपमुख्यमंत्री यांच्या माध्यमातून प्रस्तावित जागा पीएमआरडीएकडून महापालिकेकडे हस्तांतरित करण्यात आली. त्यानंतर भवनाच्या कामाला प्रत्यक्ष सुरुवात झाली.

हे हि वाचावे

“मी भीमरायाचा वाघ’ म्हणत आनंद शिंदे मंचावर गरजले, पिंपरीत उसळला भीमसागर!”

संविधान भवनाचे महत्त्व
या संविधान भवनाच्या माध्यमातून भारतीय राज्यघटनेचा अभ्यास, संशोधन आणि प्रचार-प्रसारासाठी भक्कम व्यासपीठ उपलब्ध होणार आहे. विद्यार्थ्यांपासून अभ्यासकांपर्यंत सर्वांसाठी हे भवन मार्गदर्शक ठरेल. संविधानाच्या अभ्यासासाठी खास डिजिटल लायब्ररी, आर्काइव्ह आणि माहिती केंद्र देखील येथे विकसित केले जाणार आहेत.

आमदार लांडगे यांची प्रतिक्रिया
“डॉ. बाबासाहेब आंबेडकर यांनी भारताला जो अमूल्य ठेवा दिला, त्याचा गौरव करण्यासाठी हे संविधान भवन उभारण्यात येत आहे. या भवनातून राज्यघटनेचा प्रचार-प्रसार तर होईलच, शिवाय जगभरातील लोकशाही प्रणाली आणि घटनांचा अभ्यास देखील येथे करता येईल,” असे मत आमदार महेश लांडगे यांनी व्यक्त केले.

Dr. B.R. Ambedkar Biography – Government of India

डॉ. बाबासाहेबांना सन्मानाची मानवंदना
१४ एप्रिल रोजी डॉ. बाबासाहेब आंबेडकर यांची जयंती साजरी केली जाणार आहे. या निमित्ताने संविधान भवनाच्या माध्यमातून त्यांना सन्मानाची मानवंदना दिली जात आहे. पिंपरी-चिंचवड शहरामध्ये डॉ. बाबासाहेबांच्या विचारांचा ठसा अधिक गडद व्हावा आणि नव्या पिढीला संविधानाचे भान राहावे, यासाठी हा प्रकल्प प्रेरणादायी ठरणार आहे.