“१६ एप्रिलपासून घराघरात मालमत्ता कर बिले वाटप; ३० जूनपूर्वी भरणाऱ्यांना १०% सवलत, महिलांना आर्थिक सशक्ततेची नवी संधी
पिंपरी, १५ एप्रिल २०२५: पिंपरी चिंचवड महानगरपालिका करआकारणी व करसंकलन विभागाने नागरिकांना महत्त्वाची सूचना दिली आहे. सन २०२५-२६ साठी मालमत्ता कराची बिले महिला बचत गटांच्या सहाय्याने घरपोच वितरण करण्याची प्रक्रिया १६ एप्रिलपासून सुरू होणार आहे. या उपक्रमात आर्थिकदृष्ट्या दुर्बल महिलांना समाविष्ट करण्यात आले आहे, ज्यामुळे त्यांना आर्थिकदृष्ट्या सबल होण्याची संधी मिळणार आहे.
महापालिकेच्या कर विभागाच्या प्रमुख श्री. अविनाश शिंदे यांनी मंगळवारी (दि. १५) या महिलांना मालमत्ता कर प्रणालीविषयी सखोल मार्गदर्शन दिले. महिलांना बिले वितरण करतांना कराची प्रक्रिया, बिले कशी तपासावीत, कशा प्रकारे नागरिकांशी संवाद साधावा याबाबत सादरीकरण करण्यात आले. महिलांनी उत्स्फूर्तपणे प्रश्नोत्तर सत्रात आपले अनुभव व्यक्त केले, ज्यामुळे संबंधित अधिकाऱ्यांनी समस्यांचे तत्काळ समाधान केले.
महापालिकेने वर्ष २०२५-२६ साठी ऑनलाइन मालमत्ता कर बिले https://www.pcmcindia.gov.in या वेबसाइटवर उपलब्ध केली आहेत. नागरिकांना यावरून बिले पाहता व भरता येतील. ३० जून २०२५ पर्यंत ऑनलाईन कर भरणाऱ्यांना १० टक्के सवलत देण्यात येईल. महिला बचत गटांच्या माध्यमातून बिले घरपोच वितरित केली जातील. महिलांना प्रशासनाच्या ओळखपत्राच्या सहाय्याने बिले वितरित करण्याची जबाबदारी देण्यात आली आहे.
महापालिकेने नागरिकांना विनंती केली आहे की, ज्या मालमत्तांवर “थकबाकीदार” शिक्का आहे, त्यांना जप्तीपूर्व नोटीस बजावली जाईल. तसेच, नागरिकांनी या बिले स्वीकारताना वितरकांना सहकार्य करावे आणि सोसायटीचे अध्यक्ष व सचिवांनी त्यांना प्रवेश देण्यास मदत करावी.
हे हि वाचावे
या उपक्रमामुळे महिलांना आर्थिक सक्षमतेसाठी एक महत्त्वाची संधी मिळणार आहे. “सिद्धी” प्रकल्पाच्या माध्यमातून महापालिकेने महसूल वाढवण्याबरोबरच सामाजिक सहभाग, महिला सबलीकरण, आणि कार्यक्षम सेवा वितरणावर भर दिला आहे.
"मिळकतकर बिले मिळाल्यानंतर त्यांचा तात्काळ भरणा करणे ही प्रत्येक करदात्याची जबाबदारी आहे. वेळेत कर भरल्यास महापालिकेला वेळेवर महसूल मिळतो आणि नागरी सेवा अधिक चांगल्या पद्धतीने देता येतात. नागरिकांनी बिले स्वीकारताना वितरकांना सहकार्य करावे आणि कोणतीही अडचण असल्यास संबंधित विभागाशी संपर्क साधावा." – शेखर सिंह, आयुक्त तथा प्रशासक, पिंपरी चिंचवड महानगरपालिका
"घरोघरी मिळकत कराचे बिल वाटप करण्यात येणार आहे. त्यामुळे माहे जूनपूर्वी वेळेत आगाऊ संपूर्ण कराचे बिल भरून करसवलतीचा नागरिकांना लाभ घेता येईल. त्याचबरोबर मालमत्तेशी मोबाईल क्रमांक बिनचूक जोडणी केल्यास मालमत्तेशी संबंधित अद्ययावत माहिती मोबाईलवर उपलब्ध होईल." – प्रदीप जांभळे – पाटील, अतिरिक्त आयुक्त (१), पिंपरी चिंचवड महानगरपालिका
