पिंपरी, प्रतिनिधी : पिंपरी-चिंचवड महानगरपालिकेच्या पाणीपुरवठा विभागामार्फत चिखली जलशुद्धीकरण केंद्र येथे नवीन २०० दशलक्ष लिटर क्षमतेच्या प्रकल्पाचे काम सुरू आहे. या प्रकल्पासाठी उच्चदाब वीजपुरवठा जोडणीचे काम गुरुवार, दि. ३ सप्टेंबर २०२६ रोजी करण्यात येणार आहे.
सदर कामादरम्यान कामगार व यंत्रणेच्या सुरक्षिततेच्या दृष्टीने सकाळी १० ते सायंकाळी ६ वाजेपर्यंत उच्चदाब वीजपुरवठा पूर्णपणे बंद ठेवण्यात येणार असल्याने चिखली जलशुद्धीकरण केंद्रातून होणारा पाणीपुरवठा बंद राहणार आहे.
यामुळे बोऱ्हाडेवाडी, इंद्रायणीनगर, सेक्टर ४, ६, ९, ११ व १२, शिवरस्ता, चक्रपाणी वसाहत, धावडेवस्ती, मोशी, चऱ्होली, डुडुळगाव, चोवीसावाडी तसेच इतर परिसरातील पाणीपुरवठा गुरुवारी बंद राहणार आहे. तसेच शुक्रवार, दि. ४ सप्टेंबर रोजी सकाळचा पाणीपुरवठा अनियमित व कमी दाबाने होण्याची शक्यता असल्याचे महापालिकेने स्पष्ट केले आहे.
महापालिकेने संबंधित परिसरातील नागरिकांना आवश्यकतेनुसार पाण्याचा पुरेसा साठा करून पाण्याचा काटकसरीने वापर करण्याचे आवाहन केले आहे. नागरिकांनी या कालावधीत महापालिकेला सहकार्य करावे, असे आवाहन सह शहर अभियंता (पाणीपुरवठा) यांनी केले आहे.
