नॉव्हेल इंटरनॅशनल शाळेत ‘Starlit Adventures 2025’चा झगमगता आनंदोत्सव

पिंपरी-चिंचवड | दि. १९ डिसेंबर २०२५
पिंपरी-चिंचवड येथील नॉव्हेल इंटरनॅशनल शाळेत विद्यार्थ्यांसाठी आयोजित करण्यात आलेला ‘Starlit Adventures 2025 – नववाटेचे घडणारे शिल्पकार’ हा उपक्रम मोठ्या उत्साहात आणि आनंदी वातावरणात पार पडला. विद्यार्थी, शिक्षक व शिक्षकेतर कर्मचारी यांच्या एकत्रित सहभागातून हा कार्यक्रम एक संस्मरणीय आनंदोत्सव ठरला.

या कार्यक्रमाला नॉव्हेल संस्थेचे संस्थापक अध्यक्ष माननीय आमदार श्री. अमित गोरखे (नॉव्हेल ग्रुप ऑफ इन्स्टिट्यूट), संस्थेचे कार्यकारी संचालक श्री. विलास जेऊरकर, शाळा व्यवस्थापक डॉ. प्रिया गोरखे, तांत्रिक विभाग प्रमुख श्री. समीर जेऊरकर तसेच मुख्याध्यापिका सौ. मृदुला गायकवाड यांची प्रमुख उपस्थिती लाभली.
शाळेच्या विस्तीर्ण पटांगणात आयोजित करण्यात आलेल्या या उपक्रमात विद्यार्थी व शिक्षकांनी एकत्र येऊन स्वयंपाकाचा उपक्रम राबवला. शिक्षकांच्या मार्गदर्शनाखाली विद्यार्थ्यांनी विविध चटपटीत व पौष्टिक पदार्थ तयार केले. त्यानंतर विद्यार्थी, शिक्षक व कर्मचारी यांनी एकत्र बसून सामूहिक भोजनाचा मनमुराद आनंद घेतला. या उपक्रमामुळे परस्पर स्नेह, सहकार्य व संघभावना अधिक दृढ झाली.
यानंतर विद्यार्थ्यांसाठी विविध मनोरंजक खेळांचे आयोजन करण्यात आले. खेळांमधील विद्यार्थ्यांचा उत्साह व आनंद त्यांच्या चेहऱ्यावर स्पष्टपणे दिसून येत होता. शाळेच्या पटांगणात उभारण्यात आलेल्या तंबू घरांवर आकर्षक विद्युत रोषणाई करण्यात आली होती, ज्यामुळे संपूर्ण परिसर उत्सवी वातावरणाने उजळून निघाला.

विद्यार्थ्यांच्या आवडीनुसार चित्रपट प्रदर्शनाचे आयोजन करण्यात आले. यामुळे शालेय जीवनात विद्यार्थ्यांना एक वेगळाच आणि अविस्मरणीय अनुभव लाभला. कार्यक्रमाच्या शेवटी विद्यार्थ्यांनी शिक्षकांसोबत पारंपरिक व मैदानी खेळांचा आनंद घेत कार्यक्रमाची सांगता झाली.
यावेळी बोलताना माननीय आमदार श्री. अमित गोरखे म्हणाले,
“अशा उपक्रमांमुळे विद्यार्थी व शिक्षकांमधील संवाद वाढतो. नाते अधिक मैत्रीपूर्ण बनते आणि विद्यार्थ्यांचा शारीरिक, मानसिक व सामाजिक विकास घडून येतो.”

मुख्याध्यापिका सौ. मृदुला गायकवाड यांनी सांगितले की, विद्यार्थ्यांचे मनोबल वाढावे आणि शालेय जीवनात आनंददायी आठवणी निर्माण व्हाव्यात, यासाठी अशा नाविन्यपूर्ण उपक्रमांचे आयोजन नियमितपणे करण्यात येते. यासाठी शाळेच्या सर्व विश्वस्तांचे मोलाचे सहकार्य लाभत असल्याचेही त्यांनी नमूद केले.

एकूणच ‘Starlit Adventures 2025’ हा उपक्रम नॉव्हेल इंटरनॅशनल शाळेतील विद्यार्थ्यांसाठी एक अविस्मरणीय अनुभव ठरला.