– सोसायटी फेडरेशन, स्वयंसेवी संस्था-संघटनांतर्फे नागरी सन्मान
– “राजकारण हँडल करायला पिंपरी-चिंचवडने शिकवले” : शेखर सिंह
पिंपरी-चिंचवड | प्रतिनिधी
“पिंपरी-चिंचवड शहराने मला राजकारण कसे ‘हँडल’ करायचे हे शिकवले. मतभेद असले तरी मनभेद नाहीत. त्यामुळेच मी नेहमी ‘पब्लिक सर्विस’ हा माझ्या कामाचा केंद्रबिंदू ठेवला,” अशी मनोगते व्यक्त करताना माजी आयुक्त शेखर सिंह भावूक झाले.
चिंचवड येथील ऑटो क्लस्टरमध्ये आयोजित नागरी सन्मान सोहळ्यात शहरातील सोसायटी फेडरेशन, स्वयंसेवी संस्था आणि संघटनांनी शेखर सिंह यांचा सन्मान केला. या कार्यक्रमात भाजपा आमदार महेश लांडगे, संत साहित्याचे अभ्यासक डॉ. सदानंद मोरे, तसेच विविध क्षेत्रातील मान्यवर उपस्थित होते. आरजे श्रुती यांनी शेखर सिंह यांची प्रभावी मुलाखत घेतली.
पब्लिक सर्विस हेच माझे ध्येय
शेखर सिंह म्हणाले, “शहरात अनेक विचारप्रवाह असूनही सर्वजण विकासासाठी एकत्र येतात. प्रशासकीय अधिकारी म्हणून मी कोणताही भेदभाव न करता स्वतंत्रपणे काम केले. शहरातील लोकांनी दिलेले प्रेम हेच माझे मोठे यश आहे.” त्यांनी सांगितले की, शहर स्वच्छता, आरोग्य आणि दिव्यांगांच्या विकासासाठी अनेक संस्थांचे योगदान महत्त्वाचे ठरले.
भावूक क्षण आणि अनुभवांचा ठेवा
कार्यक्रमादरम्यान शेखर सिंह भावूक होत म्हणाले, “मी काय केले हे सांगण्याची गरज नाही. जे काही केले ते नागरिकांच्या हितासाठी आणि दीर्घकालीन विकासाच्या दृष्टीने केले.” त्यांनी सांगितले की, एसटीपी प्लांट, नदी प्रदूषण नियंत्रण आणि टाऊन प्लॅनिंग क्षेत्रात केलेले काम कुंभमेळा प्रकल्पात उपयुक्त ठरणार आहे.
समाविष्ट गावांचे काम कायम स्मरणात : आमदार लांडगे
या वेळी आमदार महेश लांडगे म्हणाले, “शेखर सिंह यांनी पुढील 20 वर्षांचा विचार करून काम केले. समाविष्ट गावांच्या विकासासाठी त्यांचे योगदान मोठे आहे. वाकडपासून चऱ्होलीपर्यंतचा विकास नागरिक विसरणार नाही.”
शहरातील सर्व क्षेत्रातील मान्यवर उपस्थित
कार्यक्रमात अतिरिक्त आयुक्त प्रदीप जांभळे-पाटील, तृप्ती सांडभोर, अरविंद जैन, दिलीप पटेल, वीना सोनवलकर, कुमार कातरिया, विजय नाईक, प्रशांत मोरे यांसह सामाजिक, औद्योगिक आणि धार्मिक क्षेत्रातील प्रतिष्ठित मान्यवर उपस्थित होते. गायक अवधूत गांधी यांनी बहारदार सादरीकरण केले. कार्यक्रमाचे सूत्रसंचालन भूषण करंदीकर यांनी केले आणि “पसायदान” ने कार्यक्रमाची सांगता झाली.
