“PCU मध्ये डॉ. बाबासाहेब आंबेडकर जयंतीनिमित्त भव्य पुस्तक प्रदर्शन; हजारो विद्यार्थ्यांचा उस्फूर्त सहभाग!”

विद्यार्थी भारतरत्न डॉ. बाबासाहेब आंबेडकर जयंती साजरी करताना पीसीयू ग्रंथालयात उपस्थित

पुस्तक प्रदर्शनातून डॉ. बाबासाहेब आंबेडकर यांच्या जीवनकार्याची प्रेरणा

विद्यापीठ प्रशासनाची पुढाकाराने भारतरत्न डॉ. बाबासाहेब आंबेडकर जयंती साजरी

पिंपरी, पुणे | १७ एप्रिल २०२५

भारतीय संविधानाचे शिल्पकार, सामाजिक न्यायाचे अग्रदूत आणि मानवाधिकारांचे प्रणेते डॉ. बाबासाहेब आंबेडकर यांच्या १३४ व्या जयंतीनिमित्त पिंपरी चिंचवड विद्यापीठ (PCU), वडगाव मावळ येथे दोन दिवसीय पुस्तक प्रदर्शनाचे आयोजन करण्यात आले. विद्यापीठाच्या ग्रंथालय विभाग आणि स्कूल ऑफ लॉ यांच्या संयुक्त विद्यमाने आयोजित या उपक्रमाला विद्यार्थ्यांसह प्राध्यापक, अधिकारी आणि विविध क्षेत्रातील मान्यवरांचा उत्स्फूर्त प्रतिसाद लाभला.

प्रदर्शनाचे उद्घाटन PCU च्या कुलगुरु डॉ. मणिमाला पुरी आणि प्र-कुलगुरु डॉ. सुदीप थेपडे यांच्या हस्ते करण्यात आले. डॉ. आंबेडकर यांच्या प्रतिमेस पुष्पहार अर्पण करून अभिवादन करण्यात आले. यावेळी विद्यापीठाचे विभागप्रमुख, शिक्षकवर्ग आणि विद्यार्थी मोठ्या संख्येने उपस्थित होते.

हे हि वाचावे

“फडणवीस, शिंदे, पवार एकत्र; उद्या क्रांतीवीर चापेकर स्मारकाचे लोकार्पण”

डॉ. बाबासाहेब आंबेडकर यांच्या जीवनकार्याचा व्यापक आढावा

या प्रदर्शनामध्ये डॉ. आंबेडकर यांचे सामाजिक, राजकीय, आर्थिक आणि शैक्षणिक विचार मांडणारी आणि भारतीय संविधानाच्या निर्मितीतील त्यांच्या मोलाच्या योगदानाची सखोल माहिती देणारी अनेक पुस्तके सादर करण्यात आली. त्यांच्या संघर्षाची प्रेरणादायी गाथा आणि सामाजिक समतेसाठीचा त्यांचा लढा समजून घेण्यासाठी हे प्रदर्शन मार्गदर्शक ठरले.

उपक्रमामागील प्रमुख मान्यवर आणि आयोजन

या पुस्तक प्रदर्शनाचे संपूर्ण संयोजन डॉ. मतलूब अली खान (लायब्ररी विभाग प्रमुख) आणि प्रियांक राणा (स्कूल ऑफ लॉ प्रमुख) तसेच सहाय्यक प्रा. प्रदीप कुमार यादव यांनी केले. विविध विभागांतील विद्यार्थ्यांनी ज्ञानवृद्धीसाठी या प्रदर्शनाचा लाभ घेतला.

विद्यापीठाच्या सामाजिक बांधिलकीची प्रचिती

डॉ. आंबेडकर यांच्या विचारांचे अनुकरण करत PCU ही संस्था वर्षभर सामाजिक उत्तरदायित्व आणि शैक्षणिक उत्कृष्टतेसाठी विविध उपक्रम राबवत असते. यंदाच्या जयंती निमित्ताने देखील विद्यापीठाने एक सकारात्मक संदेश देत विद्यार्थ्यांमध्ये वाचन संस्कृती वाढविण्याचा प्रयत्न केला.

भारतरत्न डॉ बाबासाहेब आंबेडकर यांच्या बद्दल अधिक जाणून घेण्यासाठी येथे क्लिक करा

विश्वासू संस्थेचे शुभेच्छा संदेश

पिंपरी चिंचवड एज्युकेशन ट्रस्टचे अध्यक्ष ज्ञानेश्वर लांडगे, उपाध्यक्ष पद्माताई भोसले, सचिव विठ्ठल काळभोर, खजिनदार शांताराम गराडे, विश्वस्त तथा कुलपती हर्षवर्धन पाटील, व्यवस्थापन समिती सदस्य नरेंद्र लांडगे, अजिंक्य काळभोर आणि कार्यकारी संचालक डॉ. गिरीश देसाई यांनी या जयंतीनिमित्त सर्वांना शुभेच्छा दिल्या.

विद्यापीठ प्रशासनाच्या सहकार्यामुळे आणि विद्यार्थ्यांच्या सहभागामुळे डॉ. बाबासाहेब आंबेडकर जयंती केवळ औपचारिकता न राहता, विचारांची चळवळ ठरली आहे.