पिंपरी, २४ जुलै २०२५ – डिजिटल मीडिया संपादक पत्रकार संघटना (Maharashtra Digital Media Editors Journalists Association) पुणे जिल्ह्याच्या नव्या जम्बो कार्यकारिणीची घोषणा नुकतीच करण्यात आली. या वेळी गणेश हुंबे यांची पुणे जिल्हाध्यक्षपदी, प्रशांत साळुंखे यांची पिंपरी चिंचवड शहराध्यक्षपदी, तर महेश टेळे यांची पुणे शहराध्यक्षपदी नियुक्ती करण्यात आली.
रहाटणी येथील कुणाल हॉटेलमध्ये झालेल्या बैठकीत नवीन कार्यकारिणी जाहीर करताना नवनिर्वाचित पदाधिकाऱ्यांना नियुक्ती पत्र प्रदान करण्यात आले. बैठकीच्या अध्यक्षस्थानी संघटनेचे संस्थापक व ज्येष्ठ पत्रकार राजा माने होते, तर पिंपरी चिंचवड भाजप शहराध्यक्ष शत्रुघ्न काटे प्रमुख पाहुणे म्हणून उपस्थित होते.
कार्यक्रमात बोलताना राजा माने म्हणाले, “डिजिटल मीडियाचा प्रभाव दिवसेंदिवस वाढतो आहे. त्यामुळे पत्रकारांपुढे अनेक संधी व आव्हाने उभी राहिली आहेत. प्रिंट मीडियाप्रमाणेच डिजिटल पत्रकारांनाही सन्मान आणि सुविधा मिळाल्या पाहिजेत, यासाठी ही संघटना कटिबद्ध आहे.”
शत्रुघ्न काटे यांनीही संघटनेचे कौतुक करत सांगितले की, “मीडिया हा लोकशाहीचा पहिला स्तंभ आहे. पत्रकार हे निर्भीडपणे आपली मते मांडतात आणि समाजहिताचे विषय प्रभावीपणे मांडतात. अशा पत्रकारांना बळ देणारी ही संघटना निश्चितच समाजासाठी मोलाची भूमिका बजावते.”
नवनिर्वाचित पुणे जिल्हाध्यक्ष गणेश हुंबे यांनी आपल्या मनोगतात सांगितले, “ही जबाबदारी म्हणजे सन्मानच नव्हे, तर पत्रकार बांधवांचे हित साधण्यासाठी एक संधी आहे. आम्ही एकत्र येऊन डिजिटल मीडिया संपादक पत्रकार संघटना अधिक प्रभावीपणे उभी करू, जेणेकरून पत्रकारिता क्षेत्रात पारदर्शकता व गुणवत्ता टिकून राहील.”
कार्यक्रमास संघटनेचे सचिव महेश कुगावकर, उपाध्यक्ष नंदकुमार सुतार, प्रदेश उपाध्यक्ष सतीश सावंत, पश्चिम महाराष्ट्र अध्यक्ष विकास भोसले, राज्य संघटक अमोल पाटील यांच्यासह अनेक पदाधिकारी उपस्थित होते. सूत्रसंचालन सोमनाथ नाडे यांनी तर आभार यशोदा नाईकवाडे यांनी मानले.
🪪 पत्रकार कुटुंबांसाठी ‘प्रतिबिंब’ प्रतिष्ठान ठरतंय आधारस्तंभ
संघटनेच्या वतीने पत्रकार व त्यांच्या कुटुंबासाठी सुरू करण्यात आलेल्या प्रतिबिंब प्रतिष्ठानकडून आतापर्यंत ११ लाखांहून अधिक आर्थिक मदत करण्यात आली आहे. या उपक्रमामुळे अनेक पत्रकार कुटुंबांना आधार मिळाला असून, पुढील काळातही हे प्रतिष्ठान सामाजिक सुरक्षा कवच ठरणार आहे.
