📍 पिंपरी (प्रतिनिधी):
भारतरत्न डॉ. बाबासाहेब आंबेडकर यांच्या जयंतीनिमित्त राष्ट्रवादी काँग्रेस पार्टीच्या वतीने पिंपरी येथे अभिवादन करण्यात आले. शहराध्यक्ष योगेश बहल यांच्या हस्ते स्मारकस्थळी तसेच खराळवाडी येथील मध्यवर्ती कार्यालयात पुष्पहार अर्पण करून महामानवांना अभिवादन करण्यात आले.
यावेळी बोलताना शहराध्यक्ष योगेश बहल म्हणाले की, डॉ. आंबेडकरांनी भारतात व परदेशात उच्च शिक्षण घेऊन शैक्षणिक क्षेत्रात मोठे योगदान दिले. कोलंबिया विद्यापीठ आणि लंडन स्कूल ऑफ इकॉनॉमिक्समधून त्यांनी उच्च पदव्या संपादन केल्या. ६४ हून अधिक विषयांवर प्रभुत्व आणि ११ भाषांवर अधिकार मिळवून त्यांनी विद्वत्तेचा आदर्श निर्माण केला. मसुदा समितीचे अध्यक्ष म्हणून भारतीय राज्यघटनेच्या निर्मितीत त्यांनी मोलाची भूमिका बजावत देशात लोकशाही आणि मूलभूत हक्कांची पायाभरणी केली.
तसेच माजी नगरसेवक ॲड. गोरक्ष लोखंडे यांनी सांगितले की, डॉ. आंबेडकरांनी अस्पृश्यांच्या उन्नतीसाठी राज्यघटनेत केलेल्या तरतुदींमुळे त्यांना घटनात्मक हक्क प्राप्त झाले. त्यांच्या कार्यामुळे समाजकल्याणकारी योजनांना दिशा मिळाली. शिक्षण, संघटना आणि संघर्षाचा दिलेला मंत्र आजही समाजासाठी प्रेरणादायी आहे.
सामाजिक न्याय विभागाचे अध्यक्ष संजय औसरमल यांनीही आपल्या भावना व्यक्त करत आंबेडकरांच्या विचारांचे महत्त्व अधोरेखित केले.
या कार्यक्रमास शहराध्यक्ष योगेश बहल, कार्याध्यक्ष फजल शेख, विजय लोखंडे, पंडित गवळी, ॲड. गोरक्ष लोखंडे, प्रकाश सोमवंशी, राजेंद्र जगताप, शेखर चिंचवडे, नगरसेविका वर्षा जगताप, योगिता बारणे, ॲड. सचिन औटे, ज्ञानेश्वर कांबळे, संजय औसरमल, राजेंद्रसिंग वालिया, अकबर मुल्ला, शक्रुल्ला पठाण, कुमार कांबळे, प्रशांत महाजन, रवींद्र ओव्हाळ, श्रीकांत कदम, संभाजी बारणे, बाळासाहेब पिल्लेवार, संगीता कोकणे, भाग्यश्री मस्के, नीलम कदम, देवी थोरात, राजू चांदणे, सुरेंद्र सिंग बाला, चंदू हलगी, समीर थोरात, महेंद्र तापकीर, अभिजीत आल्हाट, धनाजी तांबे, सुनिल अडागळे आदी पदाधिकारी व कार्यकर्ते उपस्थित होते.
