पिंपरी-चिंचवड | दि. १७ मार्च २०२६
पिंपरी-चिंचवड महानगरपालिकेच्या हद्दीतील चिखली परिसरातील घरकुल प्रभाग क्रमांक ११ अंतर्गत पूर्णानगर, कृष्णानगर, शरदनगर, फुलेनगर आदी भागांमध्ये भटक्या कुत्र्यांचा उपद्रव मोठ्या प्रमाणावर वाढल्याने नागरिकांमध्ये भीतीचे वातावरण निर्माण झाले आहे. याबाबत राष्ट्रवादी काँग्रेस पक्षाचे नेते श्री. मारुती गणपत जाधव यांनी महापालिका प्रशासनाकडे लेखी निवेदनाद्वारे तातडीने कारवाई करण्याची मागणी केली आहे.
सदर भागात भटक्या कुत्र्यांनी हैदोस घातल्याने नागरिकांना रस्त्यावरून फिरताना सतत भीतीचा सामना करावा लागत आहे. विशेषतः वृद्ध नागरिक, महिला तसेच शालेय विद्यार्थी यांना या समस्येमुळे मोठा त्रास सहन करावा लागत असल्याचे निवेदनात नमूद करण्यात आले आहे. तसेच एमआयडीसी परिसरातून रात्री उशिरा घरी परतणाऱ्या कामगारांनाही कुत्र्यांच्या भुंकण्यामुळे आणि हल्ल्याच्या भीतीमुळे जीव मुठीत धरून प्रवास करावा लागत आहे.
अलिकडेच चाकण परिसरात घडलेल्या महिलेच्या मृत्यूच्या घटनेचा संदर्भ देत, “अशा दुर्दैवी घटना घडल्यानंतरच प्रशासन जागे होणार का?” असा सवालही जाधव यांनी उपस्थित केला आहे.
नागरिकांच्या सुरक्षेच्या दृष्टीने संबंधित भागातील भटक्या कुत्र्यांचा तात्काळ बंदोबस्त करावा, अन्यथा स्थानिक नागरिकांसह पिंपरी-चिंचवड महानगरपालिकेच्या कार्यालयावर तीव्र आंदोलन छेडण्यात येईल, असा इशाराही निवेदनाद्वारे देण्यात आला आहे.
स्थानिक नागरिकांनीही प्रशासनाने या गंभीर समस्येकडे तातडीने लक्ष देऊन योग्य ती उपाययोजना करावी, अशी मागणी केली आहे.
