पालकांचा मोठा प्रतिसाद, लसीकरण केंद्रांवर रांगा, डॉक्टरांनी दिला महत्त्वाचा इशारा!
पिंपरी (दि. ५ मार्च २०२५): पिंपरी चिंचवडमध्ये जापनीज मेंदूज्वर प्रतिबंधक लसीकरण मोहिमेस तुफान प्रतिसाद मिळत आहे. अवघ्या ३ दिवसांत ३५,००० हून अधिक बालकांना लस देण्यात आली, तर अनेक पालक आपल्या मुलांसाठी लसीकरण केंद्रांवर गर्दी करत आहेत.
मेंदूज्वर किती घातक?
“जापनीज मेंदूज्वर हा विषाणूजन्य आजार असून तो प्रामुख्याने १५ वर्षांखालील मुलांमध्ये आढळतो. मेंदूच्या मज्जातंतूंवर गंभीर परिणाम करणाऱ्या या आजारामुळे ३०-४० टक्के रुग्ण कायमचे अपंग होतात. त्यामुळे या जीवघेण्या आजारावरील प्रतिबंधात्मक लसीकरण करणे अत्यंत गरजेचे आहे.”
– विजयकुमार खोराटे, अतिरिक्त आयुक्त, पिंपरी-चिंचवड महानगरपालिका
लसीकरण केंद्रांवर पालकांचा उत्साह, डॉक्टरांनी दिला इशारा!
शहरातील शाळा, अंगणवाड्या आणि आरोग्य केंद्रांवर प्रचंड गर्दी पाहायला मिळत आहे. काही ठिकाणी पालक लसीकरणासाठी रांगेत उभे आहेत. “ताप, सतत उलट्या होणे अशी लक्षणे आढळल्यास तातडीने डॉक्टरांचा सल्ला घ्या. काही प्रकरणांमध्ये मृत्यू होऊ शकतो, त्यामुळे लसीकरण करणे हा एकमेव सुरक्षित पर्याय आहे.”
– डॉ. लक्ष्मण गोफणे, आरोग्य वैद्यकीय अधिकारी, पिंपरी-चिंचवड महानगरपालिका
लसीकरण झालेल्या मुलांची संख्या
आकुर्डी रुग्णालय – ६ हजार २८९
भोसरी रुग्णालय – ५ हजार ३०४
जिजामाता रुग्णालय – ३ हजार २३६
सांगवी रुग्णालय – ४ हजार ५३०
तालेरा रुग्णालय – ४ हजार ७२४
थेरगाव रुग्णालय – २ हजार८०६
यमुनानगर रुग्णालय – ५ हजार ७७८
यशवंतराव चव्हाण स्मृती रुग्णालय – २ हजार ३६३
पालकांनी काय करावे?
✅ १ ते १५ वयोगटातील मुलांना तातडीने लस द्यावी.
✅ मेंदूज्वराची प्राथमिक लक्षणे ओळखून डॉक्टरांचा सल्ला घ्यावा.
✅ लसीकरण केंद्रांची माहिती घेण्यासाठी महानगरपालिकेच्या अधिकृत वेबसाइटला भेट द्यावी.
“ही केवळ एक लस नाही, तर तुमच्या मुलाच्या भविष्याची सुरक्षा आहे. अजूनही ज्यांनी लसीकरण केलेले नाही, त्यांनी त्वरित केंद्रावर जावे!”
– शेखर सिंह, आयुक्त, पिंपरी-चिंचवड महानगरपालिका
