प्रभाग क्र. १ मध्ये कामाचा लेखाजोखा मांडत सुरेश (तात्या) म्हेत्रे; नागरिकांकडून विश्वासाचा कौल
“संकटात धावून जाणारं नेतृत्व!”
चिखली | प्रतिनिधी :
पिंपरी-चिंचवड महानगरपालिका निवडणूक २०२६ च्या पार्श्वभूमीवर प्रभाग क्रमांक १ (चिखली परिसर) मध्ये माजी नगरसेवक श्री. सुरेश (तात्या) रंगनाथ म्हेत्रे यांनी केलेल्या विकासकामांचा लेखाजोखा नागरिकांपर्यंत पोहोचत असून, त्यांना जनतेकडून मोठा प्रतिसाद मिळत आहे. गेल्या कार्यकाळात जनतेशी जोडलेलं नातं, सातत्यपूर्ण पाठपुरावा आणि प्रश्न मार्गी लावण्याची कार्यपद्धती हीच त्यांची ओळख राहिली आहे.
प्रभाग क्र. १ मधून गेलेल्या हाय टेन्शन वीजवाहिन्यांमुळे निर्माण झालेला धोका दूर करण्यासाठी आमदार महेशदादा लांडगे यांच्या समन्वयातून सुरेश (तात्या) म्हेत्रे यांनी महत्त्वाची भूमिका बजावली. वीजवाहिन्यांची उंची वाढविण्यात आल्याने अनेक ठिकाणी होणारे विजेचे धक्के थांबले असून नागरिकांना सुरक्षिततेचा दिलासा मिळाला आहे.
कोविड-१९ काळात प्रशासन, रुग्णालये आणि गरजू नागरिक यांच्यात समन्वय साधत त्यांनी अनेक कुटुंबांसाठी वैद्यकीय मदत उपलब्ध करून दिली. व्हेंटिलेटर, बेड आणि तातडीच्या उपचारांसाठी केलेली धावपळ आजही नागरिक आठवणीनं सांगतात. पतीनिधनानंतर आर्थिक व मानसिक अडचणीत सापडलेल्या कुटुंबांसाठी त्यांनी आधाराची भूमिका निभावल्याची भावना महिलांनी व्यक्त केली.
चिखली परिसरातील स्पाईन रोडचे रखडलेले काम, त्रिवेणीनगर चौकातील वाहतूक अडचणी, रस्ते व मूलभूत सुविधांसाठी सातत्याने पाठपुरावा करत प्रत्यक्ष कामातून परिणाम साधले. “प्रभागाचा सर्वांगीण विकास हाच माझा अजेंडा आहे,” असे ते सांगतात.
आमदार महेशदादा लांडगे यांच्या पुढाकाराने पिंपरी-चिंचवड शहरात राबविण्यात येत असलेले आयटी धोरण, डेटा सेंटर, औद्योगिक प्रकल्प व पायाभूत सुविधा विकास यामुळे शहराची ओळख औद्योगिक व व्यावसायिक केंद्र म्हणून होत आहे. या विकास प्रवाहात प्रभाग क्रमांक १ अग्रणी राहावा, यासाठी सुरेश (तात्या) म्हेत्रे सक्रिय आहेत.
जनतेशी थेट संवाद, कामाची गती आणि विश्वासार्ह नेतृत्व यामुळे प्रभाग क्र. १ मध्ये सुरेश (तात्या) म्हेत्रे यांच्याबद्दल सकारात्मक वातावरण दिसून येत आहे.
