पिंपरी-चिंचवड | प्रतिनिधी
बालकांच्या सुप्त प्रतिभेला वाव देणारा आणि स्वप्नांना पंख देणारा राज्यस्तरीय उपक्रम “हंट फॉर द सीक्रेट सुपरस्टार 2025” या वर्षी पिंपरी-चिंचवडमध्ये रंगणार आहे. समाजसेवेच्या क्षेत्रात कार्यरत केअर फॉर यू फाउंडेशन तर्फे आयोजित या उपक्रमाचा ग्रँड फिनाले रविवार, दि. ९ नोव्हेंबर रोजी डी. वाय. पाटील ऑडिटोरियम येथे दिमाखात पार पडणार आहे.
या सोहळ्याचे मुख्य आकर्षण म्हणजे भारतीय अंतराळ संशोधन संस्थेचे (ISRO) अध्यक्ष डॉ. व्ही. नारायणन यांची उपस्थिती. ते या कार्यक्रमाचे प्रमुख अतिथी म्हणून मुलांशी थेट संवाद साधणार आहेत. त्यांच्या प्रेरणादायी प्रवासातून बालकांना “अमर्याद स्वप्न पाहण्याची” आणि ती पूर्ण करण्याची ऊर्जा मिळणार आहे.
बालप्रतिभांसाठी राज्यस्तरीय व्यासपीठ
केअर फॉर यू फाउंडेशन ही 80G, FCRA व CSR मान्यता प्राप्त संस्था असून, अल्पसंपन्न बालकांना शिक्षण, संस्कार आणि प्रोत्साहन देण्याचे कार्य करते. या वर्षीच्या हंट फॉर द सीक्रेट सुपरस्टार 2025 स्पर्धेत राज्यातील ४० पेक्षा अधिक बालसंवर्धन संस्थांमधील सुमारे ९० निवडक स्पर्धक सहभागी होणार आहेत. चित्रकला, हस्तकला, सामान्य ज्ञान आणि गायन या चार विभागांमध्ये अंतिम सामना रंगणार आहे.
या स्पर्धेच्या निमित्ताने गेल्या काही महिन्यांपासून मुलांना प्रशिक्षण शिबिरे, प्री-फिनाले ऑडिशन आणि मेंटॉरशिप सत्रांद्वारे मार्गदर्शन करण्यात आले. त्यामुळे हा उपक्रम केवळ स्पर्धा नसून शिक्षण, आत्मविश्वास आणि सृजनशीलतेचा उत्सव ठरणार आहे.
प्रेरणादायी मान्यवरांची उपस्थिती
या सोहळ्यास महिला व बालविकास मंत्री मा. अदिती तटकरे अध्यक्षपद भूषवणार आहेत. तसेच, महाराष्ट्र पोलीस दलातील डीजी व चीफ ऑफ फोर्स वन आयपीएस कृष्ण प्रकाश हे मुख्य संरक्षक म्हणून उपस्थित राहतील.
आयुक्त नयना गुंडे, डी. वाय. पाटील विद्यापीठाचे कुलपती डॉ. पी. डी. पाटील आणि इतर मान्यवर या सामाजिक सोहळ्याला उपस्थित राहणार आहेत.
बालकांसाठी आयुष्यभर शिक्षणाची हमी
या उपक्रमामागील प्रेरणास्त्रोत म्हणजे संस्थेच्या संस्थापक व विश्वस्त सीए पायल सारडा राठी. त्यांच्या नेतृत्वाखाली हजारो बालकांच्या जीवनात शिक्षण आणि स्वावलंबनाचा प्रकाश फुलला आहे.
या वर्षीच्या फिनालेमध्ये एक सामाजिक परंपरा जपली जाणार आहे—स्पर्धेतील ८० विजेत्या बालकांची निवड आयुष्यभर शिक्षण आणि निवासी प्रायोजकत्वासाठी केली जाणार आहे. त्यामुळे या स्पर्धेच्या झगमगाटानंतरही मुलांचे भविष्य सुरक्षित राहील.
सामाजिक सहकार्य आणि उद्दिष्ट
या उपक्रमाला महिला व बालविकास विभाग, डी. वाय. पाटील विद्यापीठ (स्थळ भागीदार), सिल्वरराईज ग्रुपचे चेअरमन श्री. संतोष बारणे, मोनिजी एंटरप्रायझेस (आतिथ्य भागीदार), श्रीगोपाल रामनाथ धूत फाउंडेशन आणि एसएनजे एंटरप्राइजेस (मुद्रण भागीदार) यांचे मोलाचे सहकार्य लाभले आहे.
स्पर्धा नव्हे, आंदोलन
हंट फॉर द सीक्रेट सुपरस्टार 2025 ही केवळ स्पर्धा नाही, तर समान संधी, सृजनशीलता आणि संवेदनशीलतेचा उत्सव आहे. “Spreading Smiles Miles & Miles” या तत्त्वज्ञानाने प्रेरित हा उपक्रम प्रत्येक बालकात दडलेल्या सुपरस्टारचा शोध घेतो.
या फिनालेद्वारे समाजाला संदेश दिला जाणार आहे की प्रत्येक मुलात एक उज्ज्वल भविष्य दडलेले आहे — फक्त त्याला संधीची गरज आहे.
