विकासाभिमुख हिंदुत्वाचा विचार, म्हणून भाजपाचा पुन्हा निर्धार

पिंपरी-चिंचवडमध्ये ‘अबकी बार 100 पार’चा संकल्प – आमदार महेश लांडगे यांचे शहरवासीयांना आवाहन

पिंपरी-चिंचवड | प्रतिनिधी :
पिंपरी-चिंचवड महानगरपालिका सार्वत्रिक निवडणूक 2026 च्या पार्श्वभूमीवर भारतीय जनता पार्टीने पुन्हा एकदा विकासाला केंद्रस्थानी ठेवत निवडणूक रणनिती स्पष्ट केली आहे. भाजपाचे आमदार महेश लांडगे यांनी नवीन वर्षाच्या शुभेच्छांसह शहरवासीयांना भाजपाला भक्कम पाठिंबा देण्याचे आवाहन केले असून, यासंदर्भात त्यांनी सोशल मीडियावर एक सविस्तर व्हिडिओ संदेश प्रसिद्ध केला आहे.

या व्हिडिओमध्ये आमदार लांडगे यांनी 2017 पासून पिंपरी-चिंचवड शहरात सुरू असलेल्या विकासप्रक्रियेचा सविस्तर आढावा घेतला. मेट्रो प्रकल्प, नदी सुधार योजना, वेस्ट-टू-एनर्जी प्रकल्प, स्पोर्ट्स सिटी, ग्रीन सिटी संकल्पना, तसेच शिक्षण क्षेत्रातील आयआयएम आणि सीओईपीसारख्या महत्त्वाकांक्षी उपक्रमांमुळे शहराचा चेहरामोहरा बदलत असल्याचे त्यांनी नमूद केले. पिंपरी चिंचवड महापालिका निवडणूक 2026 ही केवळ राजकीय लढत नसून शहराच्या भविष्यासाठी निर्णायक ठरणार असल्याचे त्यांनी स्पष्ट केले.

“शहरात ‘देवेंद्र पर्व’ सुरू झाले असून अनेक रखडलेले प्रकल्प मार्गी लागले आहेत. काही प्रकल्प पूर्णत्वाच्या अंतिम टप्प्यात आहेत, तर काही वेगाने प्रगतीपथावर आहेत,” असे सांगत त्यांनी भाजपाच्या सत्ताकाळात प्रत्यक्ष विकास कसा झाला याचे उदाहरणे दिली. नागरिकांच्या गरजा लक्षात घेऊन पायाभूत सुविधा, पर्यावरण, वाहतूक आणि नागरी सुविधा यावर विशेष लक्ष दिले जात असल्याचा दावाही त्यांनी केला.

राज्य आणि केंद्रात भाजपाचे सरकार असल्यामुळे पिंपरी-चिंचवड शहराच्या विकासासाठी आवश्यक असलेले निर्णय जलद गतीने घेता येत असल्याचे आमदार लांडगे यांनी अधोरेखित केले. “शहरातील प्रश्न शहरातच सुटले पाहिजेत, या भूमिकेतूनच आम्ही काम करत आहोत,” असे सांगत त्यांनी पुढील टप्प्यातील शाश्वत विकासाचा रोडमॅपही मांडला. पिंपरी चिंचवड महापालिका निवडणूक 2026 मध्ये भाजपाला संधी दिल्यास विकासाची गती आणखी वाढेल, असा विश्वास त्यांनी व्यक्त केला.

नवीन वर्षाच्या निमित्ताने नागरिकांनी विकासाला प्राधान्य देत भाजपाच्या अधिकृत उमेदवारांना प्रचंड बहुमताने निवडून द्यावे, असे आवाहन करत आमदार लांडगे म्हणाले की, “एक मत म्हणजे शहराच्या विकासात दिलेले योगदान आहे.” विकासाभिमुख हिंदुत्वाच्या विचारातून शहराला उज्ज्वल भविष्याकडे नेण्याचा भाजपाचा ठाम संकल्प असल्याचेही त्यांनी सांगितले.

भाजपाच्या सत्ताकाळातील कामगिरीवर बोलताना त्यांनी सांगितले की, पिंपरी-चिंचवडमधील विकास हा केवळ घोषणांपुरता मर्यादित राहिलेला नाही, तर प्रत्यक्ष कामांमधून तो दिसून येतो. शिक्षण, आरोग्य, क्रीडा, पर्यावरण आणि नागरी सुविधा या सर्वच क्षेत्रांमध्ये झालेली प्रगती ही नागरिकांच्या विश्वासातूनच शक्य झाल्याचे त्यांनी नमूद केले. पिंपरी चिंचवड महापालिका निवडणूक 2026 मध्ये ‘अबकी बार 100 पार’ हा संकल्प पूर्ण करण्यासाठी कार्यकर्ते आणि नागरिकांनी एकत्र येण्याचे आवाहन त्यांनी केले.

शेवटी, आमदार महेश लांडगे यांनी शहरवासीयांना नवीन वर्षाच्या पुन्हा एकदा शुभेच्छा देत, “आपला पक्ष – भाजपा आणि आपला उमेदवार – कमळ,” असा संदेश देत विकासासाठी भाजपाशिवाय पर्याय नसल्याचा ठाम विश्वास व्यक्त केला.