वकील वर्गाच्या कल्याणासाठी संघटित व्यासपीठ उभे – ॲड. सचिन पानी

अतिरिक्त जिल्हा व सत्र न्यायालय ॲडव्होकेट बार असोसिएशनचा पदग्रहण सोहळा संपन्न

पिंपरी, पुणे (दि. ५ फेब्रुवारी २०२६):
वकिलांना भेडसावणाऱ्या व्यावसायिक, सामाजिक व वैयक्तिक अडचणी सोडवण्यासाठी तसेच त्यांच्या हितासाठी विविध कल्याणकारी उपक्रम राबविण्याच्या उद्देशाने “अतिरिक्त जिल्हा व सत्र न्यायालय व दिवाणी न्यायाधीश वरिष्ठ स्तर ॲडव्होकेट बार असोसिएशन, पिंपरी चिंचवड” या नव्या वकील संघटनेची स्थापना करण्यात आली आहे, अशी माहिती संघटनेचे संस्थापक अध्यक्ष ॲड. सचिन पानी यांनी दिली.

ही संघटना कोणत्याही भेदभावाविना सर्व वकिलांसाठी कार्य करेल आणि वकील वर्गाच्या समस्या न्यायालयीन व प्रशासकीय पातळीवर मांडण्यासाठी ठामपणे उभी राहील, अशी ग्वाहीही ॲड. पानी यांनी यावेळी दिली.

पिंपरी येथील मोरवाडी न्यायालय परिसरात असलेल्या बार रूम कक्षात संघटनेच्या नवनिर्वाचित पदाधिकाऱ्यांचा पदग्रहण व सत्कार समारंभ मोठ्या उत्साहात पार पडला. या कार्यक्रमाच्या अध्यक्षस्थानी ज्येष्ठ ॲड. अरुण खरात होते. तर प्रमुख मार्गदर्शक म्हणून ॲड. राकेश अकोले, बी. के. कांबळे, प्रकाश निनाळे, रमेश गालफाडे, केशव घोगरे, प्रमिला गाडे यांची उपस्थिती लाभली.

या वेळी महिला सहसचिवपदी ॲड. संगीता कुशालकर, सहसचिवपदी ॲड. संजय माने, सहायक सहसचिवपदी ॲड. सुनील डोंगरे यांची निवड करण्यात आली. तसेच प्रसिद्धी प्रमुखपदी नियुक्ती करण्यात आलेल्या ॲड. तेजस सरतापे यांना विशेष नियुक्तीपत्र देऊन सन्मानित करण्यात आले.

संघटनेच्या कार्यकारिणीत उपाध्यक्ष ॲड. सुनील माने, सचिव ॲड. तेजस चवरे, महिला सचिव ॲड. आरती अकोले, सहसचिव ॲड. प्रशांत बचुटे, महिला सहसचिव ॲड. स्नेहा कांबळे, हिशोबनीस ॲड. ऋषिकेश शिनगारे, खजिनदार ॲड. अशोक बडेकर यांच्यासह ॲड. नागनाथ सूर्यवंशी, मनोहर सोनवणे, संघर्ष सूर्यवंशी, अविनाश कांबळे, सागर पोवार, महेश जानकर, ओंकार नाणेकर, पल्लवी कुराडे, चांगुणा काकडे आदी सदस्यांचा समावेश आहे. सर्व पदाधिकाऱ्यांना मान्यवरांच्या हस्ते नियुक्तीपत्र देऊन गौरविण्यात आले.
कार्यक्रमात बोलताना ॲड. समीर चव्हाण यांनी नवीन संघटना स्थापन करण्यामागील भूमिका स्पष्ट केली. बार आणि बेंच यांच्यात सुसंवाद व समन्वय निर्माण करणे ही आपली सामूहिक जबाबदारी असल्याचे त्यांनी सांगितले.

अध्यक्षीय भाषणात ॲड. अरुण खरात यांनी नवनियुक्त कार्यकारिणीस पाठिंबा दर्शवित शुभेच्छा दिल्या. तसेच ॲड. पी. एस. कांबळे व ॲड. सुनील कडूसकर यांनीही संघटनेच्या भावी कार्यास यशस्वी वाटचालीसाठी शुभेच्छा व्यक्त केल्या.
कार्यक्रमाचे सूत्रसंचालन ॲड. तेजस चवरे व ॲड. प्रशांत बचुटे यांनी केले.