पिंपरी-चिंचवड: शहरात खेळाडूंना आंतरराष्ट्रीय दर्जाच्या सुविधा उपलब्ध करून देण्यासाठी पिंपरी-चिंचवड महानगरपालिका कटिबद्ध असून, याच पार्श्वभूमीवर क्रीडा सभापती कैलास कुटे यांनी ‘अ’ क्षेत्रीय कार्यालयांतर्गत येणाऱ्या प्रभाग क्रमांक १५ मधील विविध क्रीडा प्रकल्पांचा धावता दौरा केला. यावेळी त्यांनी क्रीडा विभागाच्या उपायुक्तांसह मैदानांची सद्यस्थिती आणि देखभालीचा सविस्तर आढावा घेतला.
या पाहणी दौऱ्यात उपमहापौर शर्मिलाताई राजेंद्र बाबर, नगरसेविका शैलजाताई मोरे, नगरसेवक अमित गावडे आणि नगरसेवक धर्मपाल तंतरपाले यांच्यासह पालिकेचे वरिष्ठ अधिकारी व कर्मचारी मोठ्या संख्येने उपस्थित होते. लोकप्रतिनिधी आणि प्रशासकीय अधिकाऱ्यांनी एकत्रितपणे परिसरातील विविध व्यायामशाळा, जलतरण तलाव आणि मैदानांची पाहणी करून तेथील त्रुटी समजून घेतल्या.
दौऱ्यादरम्यान प्राधिकरणातील सेक्टर २६ मधील श्री छत्रपती शिवाजी महाराज जलतरण तलाव व व्यायामशाळा, डॉ. हेडगेवार भवन येथील लॉन टेनिस कोर्ट, नेताजी सुभाषचंद्र बोस बॅडमिंटन हॉल आणि सावरकर उद्यानातील टेनिस कोर्टला भेट देण्यात आली. तसेच निगडी परिसरातील मदनलाल धिंग्रा मैदान, बाहुबली व्यायामशाळा आणि सेक्टर २८ मधील कै. संजय काळे मैदान व कुस्ती संकुलाची पाहणी करून खेळाडूंना भेडसावणाऱ्या समस्यांवर चर्चा करण्यात आली.
यावेळी बोलताना सभापती कैलास कुटे यांनी स्पष्ट केले की, शहरातील तरुणांना आणि उदयोन्मुख खेळाडूंना दर्जेदार सुविधा मिळणे हाच या दौऱ्याचा मुख्य उद्देश आहे. मैदानांची योग्य देखभाल, विद्युत व्यवस्था आणि आवश्यक त्या तांत्रिक सुधारणांबाबत त्यांनी उपस्थित इंजिनिअर्सना सूचना दिल्या.
या पाहणीसाठी क्रीडा पर्यवेक्षक गोरक्ष तिकोने, ज्युनिअर इंजिनिअर संदीप ठोकळे, संकेत गंधमवार आणि क्रीडा अधिकारी गंगाराम कारंडे यांचे विशेष सहकार्य लाभले. आगामी काळात या सर्व क्रीडा संकुलांचा कायापालट करून खेळाडूंना उत्तम व्यासपीठ मिळवून देण्याचे आश्वासन यावेळी देण्यात आले.
