पिंपरी, पुणे (दि. २३ मार्च २०२६) दैनंदिन अभ्यासक्रम व्यतिरिक्त विद्यार्थ्यांनी मैदानी खेळांमध्ये सहभाग घेतल्याने शारीरिक आणि मानसिक आरोग्य उत्तम राहते. पिंपरी चिंचवड विद्यापीठाचा क्रीडारंभ हा केवळ क्रीडा स्पर्धांचा महोत्सव नसून विद्यार्थ्यांच्या सर्वांगीण विकासासाठी असलेली बांधिलकी दर्शवणारा उपक्रम आहे. शैक्षणिक प्रगती सोबत क्रीडा उपक्रमांना देखील येथे प्रोत्साहन दिले जाते. अशा उपक्रमामुळे विद्यार्थ्यांमध्ये नेतृत्व, आत्मविश्वास आणि संघभावना विकसित होते असे प्रतिपादन पीसीयूचे कुलगुरू डॉ. संतोष सोनवणे यांनी केले.
पिंपरी चिंचवड एज्युकेशन ट्रस्टच्या (पीसीइटी) पिंपरी चिंचवड विद्यापीठ (पीसीयू), साते, मावळ येथे वार्षिक महोत्सव “क्रीडारंभ २०२६” आयोजित करण्यात आला होता.
या क्रीडा महोत्सवात क्रिकेट, व्हॉलीबॉल, कबड्डी, फुटबॉल, खो – खो बॅडमिंटन, टेबल टेनिस, बुद्धिबळ, कॅरम अशा विविध इनडोअर व आउटडोअर खेळांच्या स्पर्धांचे आयोजन केले होते. या स्पर्धांमध्ये ४०० पेक्षा अधिक विद्यार्थ्यांनी सहभाग घेतला होता.
यावेळी कुलगुरू डॉ. संतोष सोनवणे, प्रो-कुलगुरू डॉ. सुदीप थेपडे, कुलसचिव डॉ. अनिल महेश्वरी, तसेच विद्यापीठातील विविध शाळांचे प्रमुख आणि प्राध्यापक आदी उपस्थिती होते. प्रमुख पाहुण्यांच्या हस्ते विजेत्यांना पारितोषिक व बक्षीस वितरण करण्यात आले.
समन्वयक प्रा. सचिन इंगळे, पीसीयूचे क्रीडा संचालक डॉ. विवेक भोसले यांनी काम पाहिले.
क्रिस्टल वॉटर कॉर्पोरेशन यांनी पिण्याच्या पाण्याचे प्रायोजकत्व घेतले होते.
पीसीईटीचे अध्यक्ष ज्ञानेश्वर लांडगे, उपाध्यक्ष पद्माताई भोसले, सचिव विठ्ठल काळभोर, खजिनदार शांताराम गराडे, विश्वस्त तथा पीसीयू कुलपती हर्षवर्धन पाटील, व्यवस्थापन समिती सदस्य व उद्योजक अजिंक्य काळभोर, नरेंद्र लांडगे, कार्यकारी संचालक डॉ. गिरीश देसाई यांनी विजेत्यांचे आणि मार्गदर्शकांचे अभिनंदन केले.
