पिंपरी, दि. ११ मार्च २०२६ :
पिंपरी-चिंचवड महानगरपालिकेच्या मुख्य प्रशासकीय भवनात आज स्थायी समितीची बैठक पार पडली. या बैठकीच्या अध्यक्षस्थानी स्थायी समितीचे सभापती अभिषेक बारणे होते. बैठकीत शहरातील पाणीपुरवठा सुरळीत करण्यासाठी पाईपलाईन टाकणे व दुरुस्ती, शहरातील रस्त्यांवरील दिव्यांची देखभाल व दुरुस्ती, दफनभूमी व स्मशानभूमींची देखभाल, नागरिकांच्या पिण्याच्या पाण्याशी संबंधित प्रकल्प तसेच विविध विकासकामांना मान्यता देण्यात आली.
यासोबतच महापालिकेच्या नगररचना विभागात कार्यरत कर्मचाऱ्यांच्या रजा मंजुरीवरील खर्चास मान्यता देण्यात आली. तसेच मनपा हद्दीत मालमत्ता कराची बिले वाटणाऱ्या महिला बचत गटांनी नवीन मालमत्ता शोधल्यास त्यांना कर संकलन विभागाने मंजूर केलेल्या दराने मानधन देण्याच्या उपसूचनेसही मंजुरी देण्यात आली. याशिवाय “मुख्यमंत्री – माझी लाडकी बहीण” योजनेचे अर्ज बचत गटांच्या महिलांमार्फत भरून घेण्याचे काम केलेल्या महिला आर्थिक विकास महामंडळ, पुणे यांना जुलै २०२४ ते सप्टेंबर २०२४ या कालावधीतील प्रोत्साहन भत्ता अदा करण्याच्या उपसूचनेस देखील बैठकीत मान्यता देण्यात आली.
आजच्या बैठकीत पाणीपुरवठा विभागाकडील शहरातील पाण्याची तसेच नद्यांची त्रयस्थ संस्थेमार्फत तपासणी करणे, घरकुल ते जाधववाडी पंप हाऊसपर्यंत आवश्यकतेनुसार पाईपलाईन टाकणे, कुदळवाडी एसटीपी ते लक्ष्मी चौक (देहू-आळंदी रोड) पर्यंत पाईपलाईन टाकणे, काळेवाडी परिसरातील तसेच प्रभाग क्रमांक १६ आणि १७ मधील दिव्यांच्या देखभाल व दुरुस्तीची कामे, ब क्षेत्रीय कार्यालयाच्या नवीन इमारतीतील विद्युत देखभाल व दुरुस्ती, मोशी येथे दफनभूमी विकसित करून अंतर्गत विद्युत कामे करणे या कामांना मंजुरी देण्यात आली.
तसेच यमुनानगर रुग्णालय व निगडी अमरधाम स्मशानभूमी येथे जनित्र संच बसविणे, प्रभाग क्र. १ व १२ मधील विविध चौक व कमानींचे सुशोभीकरण करणे, भक्ती-शक्ती चौकातील अण्णाभाऊ साठे बस टर्मिनल येथे ईव्ही चार्जिंग स्टेशन उभारणे, मनपा शाळा, कार्यालये व दवाखान्यांमधील पाण्याच्या टाक्यांची शास्त्रोक्त पद्धतीने स्वच्छता करणे या कामांनाही मंजुरी देण्यात आली.
याशिवाय ताथवडे येथील जीवननगर पंप हाऊससाठी वीज भार उपलब्ध करून देण्यासाठी महावितरण कंपनीस रक्कम अदा करणे, भामा-आसखेड धरणावरील जलउपसा केंद्र ते नवलाख उब्रे ब्रेक प्रेशर टाकीपर्यंत १७०० मिमी व्यासाची रायझिंग मेन टाकणे तसेच बी.पी.टी. ते चिखली जलशुद्धीकरण केंद्रापर्यंत १४०० मिमी व्यासाची गुरुत्व जलवाहिनी टाकताना अडथळा ठरणारे उच्चदाब खांब व तारा स्थलांतरित करणे, सेक्टर २३ जलशुद्धीकरण केंद्राजवळील २२ केव्ही उपस्कर वाहिनी हटविणे यांसारख्या महत्त्वाच्या कामांनाही मंजुरी देण्यात आली.
प्रभाग क्र. ११ व १३ मधील जुने व धोकादायक पोल बदलणे, चिंचवड ख्रिश्चन स्मशानभूमी, दापोडी, निगडी, दिघी मुस्लिम व दिघी लिंगायत दफनभूमी येथील काळजीवाहक संस्थांना मुदतवाढ देणे तसेच शहरातील मालमत्ता कर बिले वितरित करणाऱ्या महिला बचत गटांना १० टक्के रक्कम देण्यास येणाऱ्या खर्चासही स्थायी समितीने मंजुरी दिली. याशिवाय पिंपरी-चिंचवड महानगरपालिकेच्या वतीने स्व. यशवंतराव चव्हाण स्मारक समितीस अनुदान देण्याच्या उपसूचनेसही बैठकीत मान्यता देण्यात आली.
या बैठकीस आयुक्त श्रावण हर्डीकर, नगरसचिव मुकेश कोळप, अतिरिक्त आयुक्त विजयकुमार खोराटे, तृप्ती सांडभोर, विक्रांत बगाडे यांच्यासह स्थायी समिती सदस्य आणि महापालिकेच्या विविध विभागांचे अधिकारी उपस्थित होते.
