पिंपरी चिंचवड
पिंपरी चिंचवड महानगरपालिका २०२५-२०२६ या आर्थिक वर्षाच्या अर्थसंकल्पात प्रभाग क्रमांक २०, संत तुकारामनगर येथील विकासकामांसाठी २५ कोटी ४० लाख रुपयांचा अंदाजपत्रकीय खर्च मंजूर करण्यात आलेला आहे. या निधीच्या मदतीने मुंबई पुणे महामार्गाच्या लगत असलेल्या कै. यशवंतराव चव्हाण पुतळ्यापासून महेशनगर चौकापर्यंत आणि अग्निशामक केंद्र ते कै. यशवंतराव चव्हाण रुग्णालय पर्यंतचा मार्ग काँक्रिटीकरण, तसेच पादचारी मार्गावर स्ट्रीट लाईट लावून अत्याधुनिक पद्धतीने सुशोभिकरण करण्याचे काम सुरू होणार आहे.
या विकासकामांसाठी आयुक्त श्री. शेखर सिंह यांच्याकडे मागणी करण्यात आली होती आणि त्यांच्या सकारात्मक प्रतिसादानंतर ही मंजुरी प्राप्त झाली आहे. प्रभाग क्रमांक २० मधील हे महत्त्वाचे विकासकामे आगामी काळात पूर्ण होणार आहेत, ज्यामुळे येथील नागरिकांच्या जीवनमानात सुधारणा होईल.
आर्थिक वर्ष २०२५-२०२६ मध्ये अर्थसंकल्पीय अंदाजपत्रकानुसार मंजूर केलेल्या विकासकामांचे थोडक्यात उल्लेखः
डॉ. बाबासाहेब आंबेडकर क्रीडा संकुलाची सुधारणा व विविध खेळांसाठी ग्राउंड विकसित करणे.
सरदार वल्लभभाई पटेल बॅडमिंटन हॉलचे नूतनीकरण.
संत तुकारामनगर येथील एसटी स्टँड समोरील वाणिज्य भूखंडाच्या पार्किंग व बस टर्मिनलसाठी आवश्यक कामे.
स्वरगंगा आणि गंगा स्कायज सोसायटीच्या पाठीमागील नाल्याची कामे.
कै. यशवंतराव चव्हाण पुतळा ते महेशनगर चौकापर्यंत तसेच अग्निशामक केंद्र ते यशवंतराव चव्हाण रुग्णालय पर्यंत काँक्रिटीकरण व सुशोभीकरण.
संपूर्ण विकासकामांसाठी २५ कोटी ४० लाख रुपयांचा निधी मंजूर करण्यात आलेला आहे. या निधीच्या सहाय्याने विविध विकासकामे लवकरच प्रत्यक्षात आणली जातील. या निर्णयाबद्दल आयुक्त महोदयांचे आभार व्यक्त करतो.असे मत माजी महापौर योगेश बहल यांनी व्यक्त केले.
