🔵 क्रांतिज्योती महात्मा ज्योतिराव फुले व भारतरत्न डॉ. बाबासाहेब आंबेडकर यांच्या जयंतीनिमित्त पिंपरी-चिंचवडमध्ये भव्य संयुक्त उत्सव

जिल्हा व अतिरिक्त सत्र न्यायालयात भव्य कार्यक्रम; मान्यवरांचे मार्गदर्शन, भीमगीतांनी रंगत

पिंपरी चिंचवड (पुणे) – महात्मा ज्योतिराव फुले व भारतरत्न डॉ. बाबासाहेब आंबेडकर यांच्या १३५ व्या जयंतीनिमित्त जिल्हा व अतिरिक्त सत्र न्यायालय, पिंपरी चिंचवड येथे संयुक्त जयंती उत्सव समितीच्या वतीने भव्य कार्यक्रमाचे आयोजन करण्यात आले. कार्यक्रमाला वकील बंधू-भगिनींसह मान्यवरांची मोठ्या संख्येने उपस्थिती लाभली.

या कार्यक्रमाचे अध्यक्षस्थान अॅडव्होकेट लक्ष्मण रामभाऊ डोमसे यांनी भूषवले. प्रमुख पाहुण्या म्हणून जिल्हा व अतिरिक्त न्यायाधीश श्रीमती संध्या सुनील नायर यांची विशेष उपस्थिती होती.

कार्यक्रमात प्रमुख वक्ते म्हणून संजय सोनवणे आणि राहुल खांडेकर यांनी उपस्थितांना मार्गदर्शन केले. संजय सोनवणे यांनी डॉ. बाबासाहेब आंबेडकर यांच्या आर्थिक धोरणांवर, सामाजिक विचारांवर तसेच नदी-जोड प्रकल्प आणि सध्याच्या केंद्र शासनाच्या धोरणांमुळे वाढणाऱ्या आर्थिक विषमतेवर सखोल भाष्य केले. त्यांनी बाबासाहेबांनी सुचवलेल्या आर्थिक, सामाजिक व राजकीय उपाययोजनांचे आजच्या काळातील महत्त्व अधोरेखित केले.

राहुल खांडेकर यांनी डॉ. आंबेडकर यांचे शिक्षण, त्यांचा संघर्ष आणि प्रेरणादायी जीवनप्रवास यावर प्रभावी भाषण केले. अॅडव्होकेट अमोल खांडेकर यांनीही आपल्या मनोगतातून उपस्थितांना प्रेरणा दिली.

कार्यक्रमास अॅडव्होकेट नारायण जगन्नाथ रसाळ, अॅडव्होकेट अरुण सदाशिव खरात, अॅडव्होकेट बी. के. कांबळे, अॅडव्होकेट सचिन पाणी, अॅडव्होकेट प्रतीक जगताप, अॅडव्होकेट अमोल खांडेकर यांच्यासह अनेक मान्यवर उपस्थित होते.
कार्यक्रमाची सुरुवात ॲडव्होकेट मुकुंद ओव्हळ यांनी सादर केलेल्या भीमगीताने झाली, ज्यामुळे संपूर्ण वातावरण भारावून गेले. तसेच अॅडव्होकेट पी. एस. कांबळे, ॲडव्होकेट सुनील माने आणि ॲडव्होकेट मिलिंद कांबळे यांनीही आपले मनोगत व्यक्त केले.

कार्यक्रमाचे सूत्रसंचालन अॅडव्होकेट नितीन कांबळे शील आणि स्नेहा कांबळे यांनी केले, तर आभार प्रदर्शन राजरत्न जाधव यांनी व्यक्त केले.

👉 एकूणच, फुले-आंबेडकर यांच्या विचारांचा वारसा पुढे नेण्याचा आणि समाजात समानता, शिक्षण व न्याय यांचे महत्त्व अधोरेखित करण्याचा संदेश या कार्यक्रमातून देण्यात आला.