भाजपा आमदार महेश लांडगे यांच्या मागणीला यश — प्रधानमंत्री आवास योजना, सोमवारी संगणकीय सोडत
पिंपरी–चिंचवड । प्रतिनिधी
पिंपरी-चिंचवडमधील हजारो कुटुंबांच्या प्रतीक्षेचा अखेर शेवट झाला आहे. डुडूळगाव किवळे घरकुल सोडत लवकरच पार पडणार असून, प्रधानमंत्री आवास योजनेअंतर्गत या दोन्ही महत्त्वपूर्ण प्रकल्पांना हिरवा कंदील मिळाला आहे. भाजपा आमदार महेश लांडगे यांच्या सातत्यपूर्ण प्रयत्नांना अखेर यश येत असून, महापालिकेकडून सोमवार, दि. १५ डिसेंबर २०२५ रोजी या सोडतीचे आयोजन करण्यात आले आहे. नटसम्राट निळू फुले रंगमंदिर (पिंपळे गुरव) येथे सकाळी १० वाजता संगणकीय पद्धतीने ही सोडत पार पडणार आहे.
महापालिकेने केंद्र व राज्य शासनाच्या सहकार्याने डुडूळगाव येथे १,१९० तर किवळे येथे आर्थिकदृष्ट्या दुर्बल घटकांसाठी ७५५ सदनिकांची उभारणी केली आहे. दोन्ही प्रकल्पांसाठी ऑनलाईन पद्धतीने अर्ज मागविण्यात आले होते. पात्र अर्जांची छाननी पूर्ण झाली असून, पुढील प्रक्रिया पारदर्शक रित्या करण्यासाठी महापालिकेकडून डुडूळगाव किवळे घरकुल सोडत संगणकीय पद्धतीने आयोजित करण्यात येत आहे. या कार्यक्रमाचे थेट प्रक्षेपण महापालिकेच्या अधिकृत फेसबुक व युट्यूब चॅनेलवर उपलब्ध असेल, अशी माहिती अतिरिक्त आयुक्त तृप्ती सांडभोर यांनी दिली.
पिंपरी-चिंचवड शहरात प्रधानमंत्री आवास योजनेची अंमलबजावणी वेगाने होत आहे. शहरातील गरजू, श्रमिक, कमी उत्पन्न गटातील कुटुंबांना स्वतःचे घर मिळावे, यासाठी आतापर्यंत जवळपास 19 हजारांहून अधिक सदनिकांची निर्मिती करण्यात आली आहे. यामुळे शहर झोपडपट्टीमुक्त करण्याचे उद्दिष्ट साध्य करण्यास मोठी मदत मिळत आहे. महापालिकेने घरकुल प्रकल्पांची गुणवत्ता, सुविधा आणि बांधकामाची गती यावर विशेष भर दिला असून, येत्या काही वर्षांत शहरातील गृहसमस्या मोठ्या प्रमाणात सुटण्याची अपेक्षा व्यक्त केली जात आहे.
आमदार महेश लांडगे यांनी डुडूळगाव व किवळे घरकुल प्रकल्पांच्या मंजुरीपासून ते सोडतीपर्यंत सातत्याने पाठपुरावा केला. शासन, प्रशासन व महापालिका अधिकाऱ्यांसोबत अनेक बैठकांच्या माध्यमातून अडचणी दूर करत त्यांनी प्रकल्प पुढे नेला. यामुळे हजारो कुटुंबांना मोठा दिलासा मिळाला असून, “स्वतःचे घर” हे अनेकांचे स्वप्न आता साकार होत आहे. नागरिकांमध्ये याबाबत प्रचंड उत्सुकता असून, डुडूळगाव किवळे घरकुल सोडत हा शब्द शहरात सध्या मोठ्या चर्चेचा विषय ठरला आहे.
प्रतिक्रिया : आमदार महेश लांडगे
“डुडूळगाव आणि किवळे येथील घरकुल प्रकल्पांची सोडत लवकर व्हावी, यासाठी आम्ही सातत्याने प्रयत्न केले. अखेर या मागणीला मान्यता मिळाली असून सुमारे दोन हजार कुटुंबांना स्वतःच्या घराचे स्वप्न पूर्ण होत आहे, ही मोठी समाधानाची बाब आहे. सामान्य नागरिकांना दिलासा देणारा हा उपक्रम यशस्वी करण्यासाठी मी पंतप्रधान नरेंद्र मोदीजी, मुख्यमंत्री देवेंद्र फडणवीस, तसेच महापालिका प्रशासनाचे मनापासून आभार मानतो.” — महेश लांडगे, आमदार, पिंपरी-चिंचवड
