पिंपरी, दि. ५ मार्च २०२५ – पिंपरी चिंचवड महानगरपालिकेच्या सक्षमा प्रकल्पाअंतर्गत शहरातील सक्रीय महिला बचत गटांना व्यावसायिक आणि आर्थिकदृष्ट्या सक्षम बनवण्याचे कार्य सुरू आहे. महिला बचत गटांना महापालिकेच्या विविध उपक्रमांमध्ये सहभागी करून रोजगाराच्या संधी उपलब्ध करून देण्याचा मानस महापालिकेचा आहे.
या उद्देशाने, पिंपरी चिंचवड महानगरपालिका आणि टाटा कम्युनिटी इनिशिएटिव्हस ट्रस्ट (टाटा स्ट्राइव्ह) यांच्या संयुक्त विद्यमाने महिला बचत गटांसाठी महिला दिनाचे औचित्य साधून पिंपरी कॉलनीतील आचार्य अत्रे रंगमंदिर येथे महिला मार्गदर्शन मेळाव्याचे आयोजन करण्यात आले.
यावेळी अतिरिक्त आयुक्त प्रदीप जांभळे पाटील यांनी मेळाव्याचे उद्घाटन केले. महिलांना आधुनिक तंत्रज्ञानाच्या ज्ञानाने सुसज्ज करून व्यवसायातील स्पर्धेत सक्षम बनवण्यासाठी या प्रकल्पाचा उद्देश स्पष्ट केला. त्याचबरोबर, टाटा स्ट्राईव्हच्या माध्यमातून महिलांना व्यावसायिक प्रशिक्षण दिले जात असल्याचे त्यांनी सांगितले.
कार्यक्रमात माजी महापौर उषा उर्फ माई ढोरे, माजी नगरसदस्या सुजाता पालांडे, टाटा स्ट्राईव्हचे मुख्य कार्यकारी अधिकारी अमेय वंजारी, टाटा मोटर्सच्या गृहिणी प्रकल्पाच्या अध्यक्षा शिल्पा देसाई यांसह इतर मान्यवर उपस्थित होते. महिलांच्या आर्थिक सबलीकरणासाठी विविध योजनांची माहिती उपस्थितांना देण्यात आली. तसेच, यशस्वी व्यवसाय करणाऱ्या महिला बचत गटांचा सन्मान देखील करण्यात आला.
महापालिकेच्या आगामी उपक्रमांतून महिलांना आपल्या व्यवसायाची गुणवत्तेची तपासणी करण्याची आणि विविध उद्योगांमध्ये स्थान मिळवण्याची संधी मिळणार आहे, असा विश्वास प्रदीप जांभळे पाटील यांनी व्यक्त केला.
कार्यक्रमाचा समारोप सांस्कृतिक कार्यक्रमाने करण्यात आला, ज्यामध्ये महिलांनी नृत्य आणि संगीताच्या माध्यमातून सामाजिक संदेश दिला.
कार्यक्रमाचे प्रास्ताविक प्रियंवदा तोडणकर यांनी केले, तर सुत्रसंचालन निशा नेमसे यांनी केले. आभार सक्षमा प्रकल्पाचे संचालक सचिन उपाध्ये यांनी मानले.
