पिंपरी-चिंचवड | प्रतिनिधी
Published on: 26 जून 2025
पिंपरी चिंचवड महापालिका हद्दवाढ आणि हिंजवडी, माण, मारुंजीसह सात गावांचा समावेश या विषयावर जनतेतून तीव्र मागणी होत असून, या पार्श्वभूमीवर भाजपाचे आमदार महेश लांडगे यांनी मुख्यमंत्री देवेंद्र फडणवीस यांच्याकडे महत्त्वपूर्ण बैठक घेण्याची विनंती केली आहे.
लांडगे यांनी मुख्यमंत्री फडणवीस यांना पाठवलेल्या पत्रात म्हटले आहे की, “हिंजवडी आयटी पार्क आणि परिसरामधील नागरी सुविधांचा अभाव, वाढती लोकसंख्या आणि IT कर्मचाऱ्यांचा होणारा त्रास लक्षात घेता, पिंपरी चिंचवड महापालिका हद्दवाढ ही काळाची गरज आहे.” #UnclogHinjawadiITPark या डिजिटल मोहिमेद्वारे हजारो नागरिकांनी देखील या मागणीला पाठिंबा दर्शवला आहे.
◆ सात गावांचा समावेश आवश्यक!
राज्य सरकारने हिंजवडी, माण, मारुंजी, जांबे, नेरे, सांगवडे आणि गहुंजे या सात गावांचा पिंपरी चिंचवड महापालिकेत समावेश करण्याची सकारात्मक भूमिका घेतल्याची माहिती माध्यमांतून समोर आली आहे. या भागात IT कंपन्यांचे जाळे, हजारो कर्मचाऱ्यांचा वावर असूनदेखील प्राथमिक नागरी सुविधा मिळण्यात अडथळे येत आहेत.
◆ नव्या महापालिकेचा विचार
पिंपरी चिंचवड महापालिकेच्या सध्याच्या अहवालानुसार, विस्तारामुळे महापालिकेवर सेवेचा ताण वाढत आहे. त्यामुळे चाकण, आळंदी व राजगुरुनगर या नगरपरिषदांचा स्वतंत्र महापालिका म्हणून विकास करण्यास महापालिकेने शासनास सूचित केले आहे.
“हा संपूर्ण परिसर PMRDA च्या अखत्यारित येतो. मुख्यमंत्रीच त्याचे अध्यक्ष आहेत. अशा स्थितीत त्यांनी स्वतः पुढाकार घ्यावा, विविध पक्षीय लोकप्रतिनिधी, स्वयंसेवी संस्था आणि नागरी संघटनांच्या उपस्थितीत बैठक घ्यावी,” असे आमदार लांडगे यांनी नमूद केले.
◆ स्वच्छ आणि नियोजनबद्ध विकासासाठी हद्दवाढ महत्त्वाची
आमदार महेश लांडगे म्हणतात,
> “पिंपरी चिंचवड परिसराचा झपाट्याने होणारा विस्तार, आयटी कंपन्यांची भरभराट, आणि नागरिकांच्या मूलभूत गरजांच्या पार्श्वभूमीवर पिंपरी चिंचवड महापालिका हद्दवाढ अत्यावश्यक आहे. नव्या गावांचा समावेश केल्यास शासकीय सेवा पोहोचतील, वाहतुकीचे नियोजन होईल आणि नागरी जीवन सुलभ होईल.”
◆ #UnclogHinjawadiITPark मोहिमेला पाठिंबा
IT कर्मचाऱ्यांनी सुरू केलेली #UnclogHinjawadiITPark मोहीम सोशल मीडियावर प्रचंड गाजत आहे. या मोहिमेमुळे सरकारसमोर या भागातील समस्या आणि वाढीव हद्दीची गरज अधोरेखित होत आहे. नागरिकांकडून देखील या हद्दवाढीला मोठा पाठिंबा मिळतो आहे.
